Rekordmange med læreplass

? Eg hadde tenkt å satsa på arbeid i resepsjon på hotell, men kom til at kontorarbeid er det heilt rette å satsa på, seier Anette Gundersen Tangen frå Meland.
Ho er godt nøgd med å ha sin eigen kontorplass ved Opplæringskontoret og i Meland kommune. Etter oppstart 21. august ser ho fram til to års kombinert læretid mellom kommunen og Opplæringskontoret. Før det har ho to år bak seg ved Knarvik vidaregåande, på sal og service.

«Greitt» lønnsnivå
? Så langt likar eg meg godt, og eg føler meg sikker på at det er dette yrket eg vil satsa på. Eg er i alle høve dum dersom eg sluttar av når det berre er eit halvår att av læretida! seier Anette.
? Har du sjekka lønnsnivået?
? Ja!
? Og synest du det er til å «leva med»?
? Kontorarbeid er vel ikkje så veldig lukrativt, men eg synest det verkar greitt.
På sosialkontoret i Meland har Anette så langt jobba med arkivering og tatt telefonar. På Opplæringskontoret har ho fått hovudansvaret for post, både arkivering og journalføring. Ho har og sett litt på rekneskap og vore med på å handla rekvisita.

Rekordmange
Og arbeidsmengda ved Opplæringskontoret tilseier at både Anette og dagleg leiar Lillian Vabø Mongstad får det travelt.
? No i haust har me fått oppretta 26 nye læreplassar, fleire enn på mange år. Me må heilt tilbake til 1997-98 for å finna tilsvarande tal, seier Vabø Mongstad.
For snart ti år sidan var det mange kommunar som tok inn lærlingar. Så har dei vorte slappare og skulda på dårleg økonomi.
? No er kommunane på veg tilbake. Eg håpar det har litt å gjera med ein runde eg hadde i kommunestyra. Men ein grunn er nok at kommunane har fått romslegare økonomi, seier Vabø Mongstad.
Haustens nye læreplassar er innan eit svært variert utval av fag: Kontor, barne- og ungdomsarbeidar, elektrikar, tømrar, bilfag, kjemiprosess, maskinarbeidar, omsorgsarbeidar, institusjonskokk, IKT, bilskade, butikk og anleggsmaskinarbeidar.
Med dei som er i gang frå før, har Opplæringskontoret no ansvaret for kring 60 læreplassar. Og med dei mange nye i haust, er talet på veg oppover.
? Innan nokre få fag, som anleggsfag og tømrar, klarer me ikkje å skaffa nok lærlingar. Elles er det få i Nordhordland me ikkje har klart å skaffa læreplass, seier Lillian Vabø Mongstad.