Ropar varsku om omstilling

– Det er først når ein godtek at det er naudsynt med omstilling, at nyskaping kan skje, seier Brundtland, som er dagleg leiar i industriinkubatoren på Mongstad, Industriutvikling Vest.

Inkubatoren vart etablert i 2011, og får støtte frå Staten gjennom Siva.

Ambisjonen og oppgåva er å vera med på å skapa nye verksemder og dermed nye arbeidsplassar i regionen.

– Det har vore gjort mykje bra næringsarbeid i Nordhordland, og det gjer kanskje at ein i dag kviler seg litt, seier Brundtland, som jobbar for å få fram nye idear innan næringslivet.

– Dersom me alle er samde om å definera Nordhordland som ein omstillingsregion, heller å ikkje engasjera seg i problemstillinga, vil det garantert gje eit løft for regionen.

Etterlyser reaksjon
Brundtland viser til fleire ting som alle ser ut til å vera uheldige for Nordhordland.

Regionen som heilskap, og kommunane kvar for seg, kjem dårleg ut i NHO si kåring av kva delar av landet som er best på næringsutvikling (sjå faktaboks).

Og i Næringsbarometeret som vart presentert førre veke, viser det seg at lokale verksemder er pessimistar til framtida.

– Det tredje er signalet frå Statoil Mongstad om at dei vil redusera innkjøp frå underleverandørar, for å klara sine kostnadskutt.

Brundtland viser til det Statoil Mongstad-sjef Lars Rosenløv formidla til Lindås formannskap i januar.

«– Me må nok stoppa 150-200 arbeidsplassar for å få kontroll med kostnadene.

Internt i Statoil vert det naturleg avgang eller intern flytting oppover i organisasjonen, så det er nok leverandørane som må lida i første omgang», uttalte Rosenløv på møtet i januar, noko som vart referert i Strilen.

– Hadde eit slikt kutt i arbeidsplassar vorte signalisert for ei storbedrift i til dømes Årdal eller Høyanger, ville det skapt stor merksemd.

Men sjølv om desse kutta vil verta spreidde på fleire underlevandørar her hjå oss, er det likevel store tal.

Eg er forundra over at dette utsagnet ikkje har vakt oppsikt i regionen.

Kvilepute?
– Samla sett er det fleire tendensar som viser at næringslivet i Nordhordland ikkje har den utviklinga ein kunne ønskja.

Det er klart at ulike undersøkingar har ulike føresetnader, men når fleire forhold peikar i negativ lei, er det grunn til å spørja om den gode utviklinga på Mongstad har vorte ei kvilepute for næringslivet, seier Brundtland.

Innovasjon Norge melder om merkbart færre søknader frå Nordhordland samanlikna med andre deler av landet, noko som igjen kan vera ein indikasjon på at strilane ikkje vil satsa på nye ting.

– Det har vore gjort mykje bra arbeid innan næringsutvikling, men ein kan ikkje kvila på dette.

No er andre regionar i landet meir svoltne enn Nordhordland, og gjer det betre enn her.

Konkrete tiltak
I dei næringsplanane som eksisterer, vert betre vegar etterlyst av fleire.

Det er ikkje eit mål Brundtland er usamd i, men han etterlyser tiltak som er meir konkrete enn vegar som kan komma om ti år eller meir.

– Store målsettingar innan samferdsel kan ein sjeldan nå innan kort tid.

Men kva kan ein gjera no? Det trengs mål som er tydelege og konkrete, og som kan gjennomførast innanfor ein kort tidshorisont.

Som eit døme trur eg at ei auka vasstilføring til Mongstad er mykje viktigare for næringsutviklinga der, enn opninga av Nyborgtunnelen, seier Børge Brundtland.

Han viser til andre regionar får til næringsutvikling, sjølv om dei har både dårlege vegar og ferjer som må forserast for å komma fram.

– Ein kan ikkje berre venta på betre vegar, og tru at det skal løysa alt.

Nøkkelen er å i større grad fokusera på dei tiltak som ein sjølv kan påverka og gjennomføra, heller enn dei tiltak der ein er avhengig av mange andre aktørar.

----------------

FAKTA
Regionen Nordhordland og kommunar her kjem dårleg ut i Nærings-NM, NHOs kåring av kva regionar og kommunar som er best på å driva næringsutvikling. Dette er Nærings-NM for 2011, som var klart heilt på tampen av fjoråret.


Topp tre kommunar, og
kommunane i Nordhordland (pluss Gulen):
Plass:    Kommune:        Snittplassering siste fem år:

1          Ullensaker                  2
2          Sandnes                     4
3          Sola                           1
…
82        Gulen                       48
101      Modalen                    60
131      Lindås                       28
197      Austrheim                 85
209      Meland                    177
367      Radøy                     302
403      Fedje                      405
430      Masfjorden              420

Topp tre regionar, og Nordhordland:

Plass     Region             Siste fem år
1          Stavangerregionen      1
2          Trondheimsregionen    3
3          Ålesundregionen        15
...
68        Nordhordland             44