Rullande musikk på Flatøy

Syttandemai-toget på Flatøy var talrikt, fargerikt og tradisjonelt, men i år hadde dei også fått med ein oppfinnsam vri. I tillegg til lyden av 17. mai-fløyter og heiarop, kunne ein også nyta marsjar av profesjonell kvalitet. Fremst i toget på Flatøy gjekk ikkje eit tradisjonelt musikkorps, men to blide menn med veivande flagg og stereoanlegget på hjul etter seg. I år var det nemleg Steinar Rossland og Jan Harald Sætre som stod for musikken.
? Me har hatt problem med å skaffa musikkorps til toget dei siste åra. I fjor gjekk me utan musikk. Det var så trist at ein nesten skulle tru me var eit gravfølgje, seier Rossland.
Dermed var det tid for nytenking. Nytt av året er ei tralle med stereoanlegg på, korrekt pynta med flagg, ballongar og bjørkeris.
? Det var Jan Harald som kom med ideen, seier Rossland.
Fremst i toget gjekk altså Rossland og Jan Harald med vogna og musikken på slep, vel motteke av bygdefolket som fylgde bak.
? Det er mykje betre med ei slik løysing, enn å gå i tog utan musikk, seier Rossland og smiler nøgd.