Rusthol i kraftmast

Strilen har vorte kontakta av lesarar som er uroa for kraftmastene på høgspentlina som går forbi Vågseidet på Lindås. Mastene er laga av jern, og i enkelte av mastene har det rusta ganske store hol i jernet, slik det eine bildet viser. Folk lurer på om mastene vil tola eit skikkeleg uver, slik me har hatt ein del av dei seinare åra. Mastene står ikkje langt frå folk, og kraftlina kryssar den gamle vegen mellom Vågseidet og Lindås.

Toler ein del
Kraftselskapet BKK var på sin årlege inspeksjon i fjor haust, og då var konklusjonen at mastene ville kunna stå nokre år til.
? Me har årlege inspeksjonar av kraftlinene, og konklusjonen er at desse mastene vil halda nokre år til, seier presseansvarleg Juliet Balgobin i BKK til Strilen.
Ho fortel at mastene er konstruerte slik at dei skal tola belastningar sjølv om jernet har fått ein del rustskadar. Ho veit ikkje kor gammal den konkrete kraftlina er, men vil tippa at ho vart sett opp på 1950- eller 60-
talet.

Sjå på nytt
Balgobin understrekar at BKK legg vekt på at folk skal kjenna seg trygge, og ho lovar at folk frå selskapet vil ta seg ein ny tur for å vurdera om mastene er modne for utskifting eller om dei kan stå nokre år til.