Sæbøskulen ny i 2009

Av Jon Halstein Tjore

jon.halstein@strilen.no

Dette seier rektor ved skulen, Rolf Sandstad, som er sekretær for plangruppa som arbeider med utbygginga ved Sæbø skule.

Nybygg

Gruppa er pålagt å vurdera to ulike alternativ. Det eine er ombygging av eksisterande bygg. Arkitekten meiner at det vil gå med om lag 20 månader med denne ombygginga, og i den perioden kan det ikkje føregå undervisning ved skulen, opplyser Sandstad. Han har ikkje noko formeining om kvar dei rundt 150 elevane skal gå på skulen desse 20 månadene, men seier at arkitektkontoret ABO har opplyst at ei brakkeløysing i byggeperioden kostar om lag kr 100.000 per månad i leige.

I løpet av våren

Det andre alternativet plangruppa skal vurdera er eit nybygg nord for det eksisterande skulebygget.

Dersom politikarane går for den løysinga, kan ein halda fram med undervisninga ved skulen under byggeperioden.

? Når kan plangruppa leggja fram eit forslag til politisk behandling?

? Det er ikkje opp til meg å avgjera, men eg vonar det vil skje i løpet av våren, seier Sandstad.

Han trur elles at ein må rekna med at det kan gå opp til tre år frå politikarane gjer eit vedtak om at det skal byggjast ny Sæbø skule, til dei nye lokala kan stå klare.

Klar til 2009

Dersom dette stemmer, kan ein ny Sæbø skule stå klar til skulestart 2009. Alternativa er altså så langt at ein byggjer om eksisterande bygg, eller at ein byggjer nye undervisningslokale nord for av noverande klasseromsfløy. Vel ein løysinga med nybygg, vert dagens klasserom rivne etter at dei nye står klare. Men planen er å bruka noverande gymnastikksal i begge alternativa.

Sandstad seier elles at dette er eit skisseprosjekt, som berre er eit grunnlag for den politiske behandlinga. Når politikarane skal ta stilling til saka, kan dei velja ein av dei løysingane som er lagt fram. Men dei kan og gå inn for noko heilt anna, eller at dei vil starta utgreiingsprosessen på nytt, seier Sandstad.