Såg frakteskuta gå ned

Politiet har no kome fram til at det var MS Heggholm som sokk i Osterfjorden i formiddag. Eigarane hadde lagt skuta til kai på Eknes, og seinast i går kveld låg Heggholm til kai der. Skuta låg med motoren i gang, dette for at lensepumpene skulle gå.
Korleis MS Heggholm har kome derifrå og ut til staden der skuta sokk i formiddag har politiet så langt ikkje funne ut noko om, opplyser operasjonsleiar Ragnar Lyssand ved Hordaland Politikammer.
? Det er tale om ei gamal skøyte som var i privat eige, seier Lyssand.
Politiet har vore i kontakt med eigarane av skøyta, og så langt trur ein ikkje at det var folk om bord.
Heggholm var bygd i tre, og var frå 1951.

Varsla politiet
Ragnar Ludvigsen fekk auge på båten klokka 09.10. Han kikka tilfeldigvis ut av kjøkenvindauget, og såg då eit fartøy med slagside.
? Dette tenkte eg at eg måtte følgja med på, seier Ragnar Ludvigsen.
Frakteskuta gjekk ned mellom Leknes i Lindås og Tepstad på Osterøy. Etter å ha varsla politiet via 112, heldt Ludvigsen vidare auga med korleis frakteskuta la seg meir og meir over. Klokka 09.25 forsvann skuta i sjøen.
? Hadde eg hatt ein båt i nærleiken skulle eg sjølvsagt ha reist ut for å sjå, seier den pensjonerte sjømannen.
Men med eit nyoperert kne og ei mil å reisa til båten sin måtte han i staden nøya seg med å halda politiet oppdatert om kvar dei skulle søka. Politibåten «Kjølen» var første leitebåt på staden, og Ludvigsen sytte for å dirigera dei rett til staden der frakteskuta gjekk under.

Avslutta 10.30
? Eg fekk filma korleis frakteskuta sokk. Det var antagelegvis mykje luft som vart stengt inne i rommet, for det kom opp mykje luft akkurat i det skuta gjekk under.
Politiet har teke beslag i filmen som viser forliset.
Helikopter var på staden klokka 09.50, og etter kvart kom også politibåten, to redningsskøyter og fleire mindre private båtar med i søket.
Kring klokka halv elleve fekk politiet rede på kva fartøy det var som sokk. Leiteaksjonen vart så avslutta.