Satsar 130 mill. på supplyskip

? Båten er oppkalla etter bestemor mi, som heitte Dina, fortel Roald Myklebusthaug til Strilen.

Saman med faren Mikkal og broren Tore driv han Myklebusthaug Rederi i Austrheim, og det var kona hans Kari Tresvik som stod for den høgtidlege dåpen ved skipsverftet Simek A/S i Flekkfjord i Vest-Agder onsdag ettermiddag.

Heile familien og mange av dei tilsette ved reiarlaget var med på dåpsseremonien.

Nummer to

«Dina Merkur», som er 73,6 meter lang og 3250 tonn dødvekt, er den andre supplybåten til reiarlaget på Fonnes. Frå før har dei M/S Aquarius. Den nye supplybåten er litt mindre enn den førre, men elles utstyrt med det meste av moderne teknologi.

? Båten er i mellomklassen når det gjeld storleik, og alt torsdag går båten til Aberdeen i Skottland. Han skal gjera teneste i oljeindustrien på britisk sokkel i Nordsjøen, fortel Roald Myklebusthaug.

Der har også den andre supplybåten til reiarlaget oppdraga sine.

Bygginga av båten har teke vel eitt år, og prisen ligg på rundt 130 millionar kroner. Hovuddekket er på 680 kvadratmeter.

Motorane er laga av Rolls-Royce Marine AS.

24 mann

Båten har eit mannskap på tolv, og dei går i to skift, slik at det totalt er arbeid for 24 personar.

? Alle er norske, og dei kjem frå heile landet, men eg trur ikkje det er strilar blant dei, seier Myklebusthaug.

Nokre har vore tilsette i reiarlaget frå før, og ein del er nytilsette.

At Myklebusthaug gjer så tunge investeringar, er sjølvsagt eit uttrykk for at dei har tru på denne marknaden.

? Dette er ei investering for ein del år framover, fastslår Roald Myklebusthaug.