Satsar på «Opplev Nordhordland»

– Me trur dette kan utvikla næringa og profilera regionen på ein mykje betre måte, seier styreleiar Kristin Handeland i Nordhordland Reiselivslag.

Ho har også heile styret i Regionrådet bak seg om nysatsinga, som vil leggja reiselivet si økonomiske satsing inn i ein ny næringshage for reiseliv, kultur og oppleving.

– Dagens Mongstad Næringshage vert avvikla avdi seksårsperioden med støtte blant anna frå Statens Industrivekstanlegg (SIVA) går ut i haust, seier styreleiar Marvid Dale.

Kontor i Austrheim
Næringshagen har framleis pengar på bok, men må etablerast på nytt med nye eigarar innan 15. oktober. Den nye hagen vil satsa på reiseliv.

– «Opplev Nordhordland» er forslaget til namn på den nye næringshagen, som er tenkt å få kontor i Austrheim. Der er reiselivsbedriftene inviterte som aksjonærar, seier Dale.

Laget består
Nordhordland reiselivslag er meint å bestå, men berre som ei medlemsbedrift som skal samarbeida med Opplev Nordhordland.

– Laget får ingen tilsette etter den nye modellen. Alle medlemspengane som kjem inn, går direkte til marknadsføring, opplyser Handeland.

Tre tilsette
Staben som skal jobba med reiseliv, skal tilsetjast i Opplev Nordhordland.

– Med eit nytt selskap vil me få med Siva med årlege tilskot. Men ei større satsing med tre tilsette krev at aktørane i regionen samlar seg om det nye selskapet. Målet er eit årsbudsjett på vel to millionar kroner, seier Marvid Dale. Kommunane, som i stor grad har trekt seg ut som medlemer i dagens reiselivslag, vil no bidra økonomisk i drifta av det nye aksjeselskapet.

– Kommunane skal betala litt mindre enn i dag, samla kring 300.000 kroner per år, opplyser Kristin Handeland.
Reiselivsbedriftene skal ha 51 prosent av aksjekapitalen i det nye selskapet.

– Både hotella, Utvandrarsenteret, Knarvikmila, Lyngheisenteret, Havsportveka og andre aktørar er velkomne til å verta aksjonærar, seier Dale.
Reiselivslaget inviterer til eit informasjonsmøte om nysatsinga på Alver Hotel den 5. september.