Satsar på proffsykling

– Det var pappa som først fekk interessa. Eg visste ikkje at eg likte å sykla før eg etterkvart begynte å bli med han på turane hans, seier Kristoffer.

Lynkarriere

Det viste seg snart at talentet til 22-åringen var betydelig større på sykkelen enn på fotballbana.

Sommaren 2008 kjørte han inn til ei god tid på Bergen-Voss, og i august begynte han på sykkellinja på ein folkehøgskule utanfor Molde.

– Det var då eg begynte å trena organisert. Eg bestemte meg for å sjå kor god eg kunne bli, seier han.

Hekta på trening

Kristoffer elskar følelsen han har etter å ha gjennomført ei optimal treningsøkt.

– Det er kjekt å oppleva framgang og nå målsetningane dine.

Sykling er ein av dei absolutt tøffaste idrettane du kan driva med, og gir ein god følelse når ein lukkast.

Det handlar også om farten, spenninga og kicket ein får av å sitja på ein sykkel som beveger seg bortover asfalten i oppimot 100 km/t, seier han.

Satsar fullt

Etter folkehøgskulen vart studiar og «vanlig» jobb sett på vent.

For å få ein skikkeleg plass å sykla, flytta han til Sandnes for halvtanna år sidan og syklar no for Sandnes Sykleklubb. I 2010 klinte han til med etappe- og samanlagtsiger i Fana 2 dagers.

Året etter sykla han inn til 7. plass i Rankingrittet under Jæren Sykkelfestival og 12. plass i NM Gateritt.

– 12. plassen i NM var sjølvsagt eit høgdepunkt som gav vidare motivasjon.

Det er oppturane som driv deg vidare og gjer at du gløymer nedturane, sjølv om det er ein god del fleire nedturar enn oppturar, vedgår han.

Trener 20 timar veka

Kor mykje Kristoffer trener, kjem an på kor tid på året det er, om det er ei hard eller lett veke og kva som er fokuset den veka.

– Eg trener rundt 20 timar i normale veker.

Då er det langturar på 5-6 timar, intervalløkter på halvannan time, styrkeøkter på halvannen time og nokre lette restitusjonsturar, seier han.

I vinter har det blitt mykje jogging og bakkeintervall, treningsstudio og terrengsykling.

Det forbetrar oksygenopptaket.

Sykkelgrunnlaget legg han på terrengsykkelen.

– Nokre minusgrader og snø er ikkje noko problem så lenge ein har godt utstyr og riktige klede, seier han.

Men det er viktig å få timer på raceren også. Difor reiser han på treningsleirar til utlandet.

– I januar var eg på Gran Canaria og i dag laurdag reiser eg til Alicante, seier han.

Ønskjer å bli proff

Draumen er å bli proffsyklist, slik som forbilda hans Thor Hushovd og Edvald Boasson Hagen. Men det finst fleire nivå av det å vera «proff», forklarer han.

– Ein kan vera semiproff.

Det er nivået eg no ligg rett under og håpar å komma opp på i løpet av denne sesongen.

Over der er det to nivå til, der Hushovd og Boasson Hagen ligg på toppnivået.

Eg vil fortsetja å sykla så lenge eg opplever framgang og synest det er moro å halda på med.

Forhåpentlegvis resulterer det i at eg blir proffsyklist, seier han.

Sykling for alle pengane

Når Kristoffer ikkje syklar eller driv med restitusjon, skriv han artiklar for nettavisa til faren, www.sykkelnytt.no.

Det trivst han veldig godt med.

– Eg er glad i å skriva. Dessutan er det ein perfekt jobb for meg sidan eg kan jobba med det kor som helst, seier han.

Etter treningsleiren i Spania, skal han ein tur til Belgia og sykla nokre konkurransar.

Men den verkelege sesongopninga kjem i eit fransk etapperitt i midten av april.

I slutten av same månaden ventar det første rittet her heime, NorgesCup i Sandnes, fortel han.
For proffsyklistane starta sesongen allereie tidleg i januar i Australia.

Dei europeiske ritta starta no i februar.

Her i Noreg begynner sesongen i april og held fram heilt til oktober.

Proffane sin sesong går også til oktober.

Trongt nålauga

– Kor tid kan me heia på deg i Tour de France, då?

– Det er umogleg å svara på i grunnen.

Men dersom alt går optimalt og framgangen fortset som han har gjort, så blir det nok ikkje før om kanskje fem år.

Det er eit ekstremt trongt nålauga, noko dei fleste som ikkje driv med sporten ikkje skjønnar.

Det er ein lang veg å gå, men eg er motivert og nærmar meg målstreken for kvart år som går, seier den unge mannen med stålviljen.