Seier nei til 700 bustader på Flatøy

? Det er heilt uaktuelt med så mange nye bustader, seier ordførar Solbjørg Åmdal Sandvik.
Grunneigarar har store planar for utvikling av Midtmarka-området på Flatøy. Det mest omfattande framlegget er ei utbygging som inneber 700 nye bustader fordelt på sju felt. Men dette møter no motbør. Styringsgruppa for reguleringsplanen, der politikarar og tilsette i kommunen sit, gjev no signal om at talet må reduserast kraftig.
? Ei utbygging må tilpassast området både estetisk og i forhold til infrastrukturen der. Dette gjeld og talet på bustader, seier ordføraren.
Styringsgruppa har ikkje talfesta kor mange bueiningar dei meiner området toler. Men gruppa gav på førre møte klart uttrykk for at ein ikkje må redusera utbygginga så mykje at det øydelegg økonomien i planane. Likevel ønskjer styringsgruppa seg ei utvikling som ikkje raskt tvingar fram ny skule og andre større tiltak.
? Men det er rom for ein del utbygging. Det vert få elevar på Flatøy skule i åra som kjem. Det kan og henda at ein i periodar kan flytta elevar frå dei eldste klassetrinna over på skulane Sagstad eller Grasdal, seier Åmdal Sandvik.
Ho ser og for seg at nye bebuarar på Flatøy også kan nytta barnehagar på Frekhaug eller Moldekleiv.
Ordføraren legg dessutan vekt på at det ikkje berre vert barnefamiliar som flyttar inn i nye bustader i Midtmarka.
Planane omfattar etablering av hotell, og styringsgruppa legg vekt på at hotellområdet skal utviklast først.
? Eit velværehotell vil vera eit unikt tilbod i Nordhordland, seier Åmdal Sandvik.
Kommunen tek sikte på å få til ein avtale med grunneigarar og utbyggjarar om finansiering av det vidare planarbeidet.
Styringsgruppa har inga formell makt i forhold til planane, men gjev signal om kva det politiske fleirtalet ønskjer seg i Midtmarka.