Seks smell på 48 timar

– Ja, det er veldig mange på så kort tid, men ulukkene er så ulike at det går ikkje an å seia noko anna om dei enn at det er heilt tilfeldig.

Det seier lensmann Einar Vatne i Nordhordland lensmannsdistrikt som har fått kjørt folka sine skikkeleg dei siste dagane.

Ulukkene me snakkar om, begynte måndag ettermiddag klokka 15.21.

Sykkel og buss

Då frontkolliderte ein buss og ein tungmotorsykkel på Lunde på Radøy.

Medan politiet var der, fekk dei melding om ei anna ulukke på Øksnes i Austrheim der ei kvinne hadde kjørt i ein stein.

Tysdag ettermiddag/kveld var det på an igjen.

Tilhengarar

Då gjekk ein tilhengar rundt i Seim i Lindås, berre ti minutt før ein annan bil mista tilhengaren på Nordhordlandsbrua.

Onsdag føremiddag i 10-tida gjekk ulukkesalarmen igjen.

Vogntog

Denne gongen stod eit vogntog fast i «gymnasbakken» i Isdal og trafikken måtte dirigerast manuelt i nesten to timar.

Klokka 19.42 kom det melding om at ein ung mann hadde kjørt i grøfta på vegen ned mot Lekneskaien i Lindås på grunn av eit illebefinnande.

– Det einaste eg kan seia, er at det er all grunn til å vera vaken og merksam i trafikken og at ein ser etter at det ein kjører er i orden, seier Vatne.