Senkar naust under streke protestar

Takhøgda og takvinkelen på eit nytt naust på Rossnes på Radøy har vorte ei heit potet dei siste par åra. Administrasjonen og politiske utval i kommunen har pålagt May Lisbeth Hetlevik å redusera takhøgda, og viser til vilkår i byggjeløyvet. Hetlevik har protestert, men no har ho bøygd seg for kommunen sine pålegg. I desse dagar har handverkarar senka mønehøgda på naustet med om lag 60 centimeter. Takvinkelen har vorte flatare enn på det naustet som vart bygd i 2004.

Ikkje likt
? Me meiner at folk vert ikkje behandla likt her i kommunen. Kontaktar kan vera gode å ha, seier Lillian Hetlevik til Strilen.
Ho er mor til May Lisbeth og har følgt prosessen heile vegen. Ho har ein heil perm full av papir, foto og teikningar, som viser at det finst mange naust på Radøy som er like høge og har like spiss takvinkel som det naustet dottera sette opp.
? Eg har jobba i det offentlege i 40 år, og eg har aldri opplevd ei så firkanta handsaming, seier ho.

Finare
Hetlevik vedgår at naustet som vart bygd, var annleis enn det som stod i byggjeløyvet, men seier dette vart gjort for å tilpassa naustet betre til husa rundt, og at endringa ikkje var vesentleg. Og ho avviser at dette vart gjort for at rommet over naustet skulle brukast til overnatting.
? Det skal brukast til lagerplass, og det har aldri vore baktanken at dotter mi skulle tena økonomisk på dette, seier ho.

Streng
Ho meiner kommunen har vore urimeleg streng i denne saka, og at det ser ut for at dei skulle statuera eit eksempel.
? Eg kjenner ikkje til andre tilfelle der eigaren har vorte pålagd å riva, seier ho og fortel at naboane rundt tykkjer pålegget er urimeleg. Men no har dottera altså bøygd seg for pålegget og tilbakeført naustet til den forma som stod i byggeløyvet. Det tok det handverkarane to dagar å fullføra, så det har kosta ein del pengar.
? Og naustet var finare før, seier Hetlevik.
Det lukkast i går ikkje Strilen å få ein kommentar frå Radøy kommune til saka om Rossnes-naustet.