Ser behov for privat eigedomsskatt på Fedje

– Inntektspotensialet er inntil 1,5 millionar kroner per år, peikar rådmann Vidar Bråthen på i sitt framlegg til budsjett og økonomiplan.

Han viser og til at eigedomskatt frå hus og hytter, som Fedje-politikarane fram til no har sagt nei til, kan dekka inn inntektstap frå oljeinstallasjonar i sjø. Her får kommunen mindre eigedomsskatt enn før.

Likevel ser rådmannen det som uheldig at kommunen sjølv må finna dekning for det nemnde inntektstapet.

Solid økonomi
Sjølv om rådmannen argu­menterer for eigedomsskatt, peikar han på at Fedje likevel har «skjøtta buet» på ein god måte. Kommunen har klart  å byggja opp ein buffer, og har no kring 23 millionar kroner på fond.

Og det kan koma vel med - for forventningspresset blant knapt 600 innbyggjarar er stort: Nye investeringar står i kø.
Det vil rådmannen takla betre ved å vidareføra planleggjaren som vart tilsett i vår, i tillegg til dei vel 60 årsverka kommunen har i dag.

Lønsutgiftene utgjer kring 70 prosent av driftsbudsjettet. Må kostnadene ned, vil det få konsekvensar for bemanninga. Det som uansett får konsekvensar for bemanninga, er den nedgangen Fedje for tida har i barnetalet.

Ser lyspunkt
Reservefondet kommunen har, er no lik det kommunen har i lån, men rådmannen åtvarer mot å tappa fonda ytterlegare ned.
Det ser han som ei kortvarig løysing som vil auka gjeldsbelastninga.

Trass låg aktivitet i den private sektoren, dreg rådmannen og fram ein del lyspunkt:
Eit omstillingsprosjekt har vore inspirerande for dei som har vore med, og det har resultert i danninga av Fedje Næringsråd.

Kommunen er i god gang med rullering av kommuneplanen og bygging av utleigebustader. Tilrettelegginga av nytt bustadfelt på Vestkanten er godt i gang.
Innan reiselivet vert det jobba både med hotellplanar og nye hyttefelt.

Vil auka husleigene
Etter rådmann Bråthen sitt framlegg vil Fedje også driva i pluss i 2012. I år ser netto driftsresultat ut til å verta 2,3 millionar av samla utgifter på vel 60 millionar.
Det same resultatet er sett opp i budsjettet for neste år.

Fedje har hatt armslag til å gje tenester langt ut over det pålagte, men må vera budde på å ta mange vanskelege val i framtida, åtvarer Bråthen.

For å auka inntektene, gjer han framlegg om å auka dei kommunale husleigene med kring 1000 kroner månaden. Men utan vesentleg auke i inntektene, ser rådmannen for seg at overskotet på drifta vil minka fram mot 2015.