Ser fram til at nyevegen kjem

? Eg trur det er den beste traseen som er vald no, seier Ragnvald Seim til Strilen.
Han bur i det øvste huset på Sletten og kan sjå rett ned på anleggsarbeidet som no pågår. Det einaste han er litt misnøgd med, er at brua som skal gå over den gamle vegen til Seim, er litt for lang. Og så irriterer han seg over at veganlegget ofte vert kalla Åse - Herland.
? Det går ikkje bortom Åse i det heile. Der vegen går, høyrer til Erstad, påpeikar han.

Hard strid
At ein no snakkar om Espeland - Herland tykkjer han er betre, men det er ikkje heilt rett det heller. Utbetringane skal strekkja seg heilt til Vatne.
Ragnvald Seim hugsar godt diskusjonen som pågjekk på slutten av 1960-talet, då traseen til den noverande Rv 57 vart fastlagd. Seim Bondelag engasjerte seg sterkt i den saka, og han var ein av dei som deltok.
? Då gjekk det hardt for seg, minnest han.
Mange ville ha vegen forbi meieriet på Seim i ein viadukt over elva.
? Det er ei lukke at det ikkje vart ein realitet. Tenk korleis det ville ha teke seg ut, seier han.
Han er også glad for at vegen ikkje vart lagd over bøane på Herland, slik det var snakk om ein gong.

Bruka gamlevegen
Når veganlegget er ferdig, ser han fram til å kunna bruka den gamle vegen til Seim viss han skal ut på butikken. Då vil all tungtrafikken, som no går på gamlevegen, gå på nyevegen og gjennom den nye tunnelen til Herland.
Den noverande Herlands-
tunnelen og den nye vegen vidare til Isdalstø stod klar i 1972, slik at det vil gå 35 år til den nye vegen er ferdig. Den skal etter planen opnast til jul neste år.