Signerer for Arna-Bjørnar

Ingrid Ryland vaks opp på Kaland, og har altså spelt fotball for Austrheim IL under oppveksten. Men etter 10. klasse byrja ho på skule i Norheimsund, og spelte i fjor på Åsane.
? Eg gler meg veldig, smiler 17-åringen, som no også får sin debut i landslagssamanhang.
Kontrakten er ikkje signert, men alt tyder på at det unge fotballtalentet vert Arna-Bjørnar-spelar.
? Me ønskjer å sikra oss henne. Ho ønskjer å koma til oss. Og Åsane har signalisert at dei er villige til å la henne gå. Eg trur det formelle vil vera på plass i løpet av neste veke, seier Arna-Bjørnar-trenar Morten Kalvenes.

Frekk og direkte
Hovudpersonen sjølv gler seg veldig til å kunna kle seg i den svarte- og raude drakta. Ho trena eit par gonger med Arna-Bjørnar før sommaren i fjor, men vart for alvor teken inn i varmen etter Sommarproffveka 2006, som Arna-klubben arrangerer.
? Her fekk hun vist seg så pass fram at ho vart tilknytt oss på hospitantbasis. I haust trena ho med oss ein gong i veka. I vinter har ho gjort det éin til to gongar i veka, opplyser Kalvenes. Han er så langt svært nøgd med det ungjenta har prestert.
? Eg trur absolutt at dette er ein spelar som kan tilføra oss noko. Ho er ein offensiv spelartype, har god fart, og har mykje i seg til å verta ein bra målscorar. Ho er både frekk og direkte når ho har ballen, oppsummerer toppserietrenaren.
Han antydar at Ingrid Ryland er den av nykomarane som kanskje har markert seg best i treningskampane i vinter med toppseriemotstand.
? Ho har scora to mål og servert fleire målgjevande. Ho har kort fortalt markert seg veldig positivt på kort tid, rosar han.
Og det er fleire enn Morten Kalvenes som har fått augo opp for den lovande 17-åringen. J19-landslagstrenar Jarl Torske har nemleg teke ut Austrheim-jenta i troppen til 8-nasjonersturneringa på La Manga i perioden 10. - 17. mars.

Sytte for opprykk
Ingrid Ryland er svært takksam for tilliten hun har vorte vist i Arna-Bjørnar.
? Av dei fem treningskampane eg har spelt, har eg fått starta i fire, fortel Austrheim-jenta, som altså kjem til Arna-Bjørnar frå Åsane. I fjorårets avgjerande kvalifiseringskamp mot Førde scora ho Åsane sine to einaste mål, og sytte dermed for opprykk til 2. divisjon.
Inntrykket av hennar nye «arbeidsgjevar» er upåklagelig.
? Eg stortrivst alt, og håpar å utvikla meg godt. Det viktigaste no er å prestera stabilt og unngå skadar, seier hun, og legg ikkje skjul på at ein plass i førsteellevaren er draumen.
? Slikt kan ta lang tid, men det kan også skje veldig fort, forklarar Kalvenes.
17-åringen er elev på idrettslinja på Framnes VGS i Norheimsund. Det betyr halvannan times reisetid kvar veg for å delta på trening. Men dette vert det slutt på til våren.
? Då flyttar eg tilbake til Åsane for å begynna på idrettslinja på U.Phil. Det er i alle fall planen, fortel ho.