Silje Hope i Grand Prix

– Det vert veldig spennande. Me meiner me har ein god låt, seier Silje Hope (33) til Strilen.

Laurdag 28. januar står ho på scena saman med dei andre i jentegruppa Cocktail Slippers, i den andre delfinalen i den norske finalen i European Song Contest (Melodi Grand Prix).

Denne delfinalen går i Larvik.

– Me skal syngja ein låt som heiter «Keeps on dancing».

Den handlar om ei såkalla femme fatale, ei litt forførande dame som ikkje er så lett å temja, seier Hope.

Masfjorden
Silje Hope er for det meste oppvaksen i Oslo, men begge foreldra hennar kjem frå Masfjorden.

– Far min var frå indre Hope, og mor mi er frå Sandnes.

Me eig det huset der Kvamsdal fargeri held til, og me har feriert ofte i Masfjorden, så eg kjenner meg veldig knytt til kommunen, seier Silje Hope til Strilen.

No er ho busett i Oslo og jobbar stort sett med musikk på heiltid.

Ho er vokalist i Cocktail Slippers, som har eksistert i om lag ti år.

– Kunstnarnamnet mitt er «Hope», det gjev meining både her i landet og i utlandet.

Little Steven
Silje Hope fortel at gruppa mellom anna har samarbeidd med Steven van Zandt, «Little Steven», gitarist i bandet til Bruce Springsteen og skodespelar i TV-serien Sopranos.

– Takk vera han var me på ein turné i USA i fjor haust.

Me har også vore med i TV-programmet «Senkveld».

Bandet har gjeve ut fleire plater og er for tida i gang med ei ny.

Fjør i hatten
Låten dei skal opptre med i Grand Prix, har dei komponert sjølve.

– Me er ganske fornøgde med at me vart plukka ut til å vera med i finalen.

Etter det eg har høyrt, vart det sendt inn mellom 500 og 600 melodiar til konkurransen, og det er berre 24 som får vera med i finalen, seier Hope.

Ho fortel at musikken Cocktail Slippers spelar, er ganske rocka, med rockemusikk frå 1950- og 60-talet som inspirasjon.

– Me har vorte samanlikna med «The Runaways» og jamvel «The Supremes».

«The Runaways» var ei amerikansk jentegruppe på 1970-talet, og «The Supremes» skulle vel ikkje behøva nokon nærare presentasjon.

Tette vokalharmoniar er noko av varemerket til Cocktail Slippers også.

Håpar på finale
«Cocktail Slippers» er først ut i delfinalen frå Arena i Larvik.

Dei kjempar mot åtte andre melodiar om å kvalifisera seg til finalen i Oslo Spektrum i februar.

– Me håpar sjølvsagt å koma dit, seier Silje Hope, og oppfordrar folk til å delta i avstemminga.

Ho fortel at dei likar å opptre i ulike kostyme, og i Grand Prix skal dei vera utkledde som sirkusartistar, og der ho er sirkusdirektøren.

– Det skulle vel passa bra sidan heile European Song Contest er litt av eit sirkus, seier ho.

 Gode karakterar
Oslo-avisene VG og Dagbladet har høyrt gjennom alle dei norske MGP-bidraga og gjeve sine synspunkt.

Hjå VG vert Cocktail Slippers sin song kåra til det aller beste bidraget, og er den einaste som får terningkast fem.

Dagbladet gjev femmar til tre andre kandidatar, medan Cocktail Slippers får terningkast fire.