Sindre Marøy redda Løv-Ham

Løv-Ham måtte ha poeng mot serievinnar Strømsgodset for å klara seg i den nest høgaste divisjonen. Men då det var spelt ein time såg det svart ut, Strømsgodset leia 2-0 etter skåringar av Øyvind Leonhardsen og Peter Kovacs.
Men to strilar redda plassen for Løv-Ham, som også vert trena av ein stril, Trond Bjørndal frå Meland.
Først var det den tidlegare Kvernbit-, Åsane-, og Brann-spelaren Endre Hansen som reduserte til 2-1 etter 79 minutt. Og så var det Sindre Marøy sin tur, den tidlegare Radøy/Manger-spelaren kom innpå etter ein time og gjorde det han skulle. I det 83. minutt stussa han vidare eit innlegg frå Vegard Landro, og dermed klatra Løv-Ham forbi både Pors og Tromsdalen på tabellen, og opp til sikker plass.

Mål nummer to
Dette er det andre målet Marøy har sett inn for Løv-Ham etter overgangen i sommar, det første målet var 2-1-skåringa som han laga i førre serierunde mot Manglerud/Star. Løv-Ham vann den kampen 5-1.
Til no i karrieren har Marøy spelt for desse klubbane: Hordabø, Radøy/Manger, Brann, Hovding, Radøy/Manger (igjen), og no altså Løv-Ham. Spelarkontrakten med Løv-Ham varar ut 2007.

22 mål i tredje
I tillegg til skåringa i 1. divisjon er Marøy også høgt på skåringstoppen i tredjedivisjon denne sesongen. Marøy noterte seg for 22 mål i tredjedivisjon i år, og delte skåringstoppen for divisjonen med Trond Heggestad (Austevoll) og Torbjørn Birkelund (Nest-Sotra). Marøy har denne sesongen spelt i tredjedivisjon for to klubbar, først for  Radøy/Manger i avdeling 14, og deretter for Løv/Ham 2 i avdeling 15. For Radøy var han med sine mål med på å sikra ein tredjeplass, medan Løv/Ham sitt andrelag vart nest sist i avdeling og rykkte ned.
Det er Bergensavisen som har laga oversikta over skåringar i tredjedivisjon.