Sjølvbyggjarprosjektet vann pris

? Prisen er sosial- og helseetatens «Grand prix», seier Marit Helle i sosial- og helsedirektoratet.
Til årets pris kom det inn 97 søknadar frå heile landet. Juryen tok med fem tiltak i finalerunden, og mellom dei var sjølvbyggjarprosjektet. Meland-prosjektet gjekk heilt til topps i kåringa, og får dermed 100.000 kroner i premie.
«Det nytter»-prisen vert delt ut av sosial- og helsedirektoratet og Kommunenes sentralforbund (KS). Prisen har vorte delt ut i sytten år. Mellom tidlegare vinnarar er «Øvre Eiker viser ansikt», ei folkerøyrsle som kom som ein reaksjon på nynazistiske aktivitetar. Øksnes Asvo har fått prisen to gonger for den positive innsatsen for brukarane innan helse- og sosialsektoren.
Sjølvbyggjarprosjektet i Meland skal leggja til rette for nøkterne bustader til ungdom og andre som har vanskar med å koma seg inn på det vanlege bustadmarkedet. Dei vert tekne med i planlegginga og arbeidet med å byggja eller rehabilitera bustadane.