Skal fjerna lukt i Sløvåg

Etter eksplosjonen og brannen hos Vest Tank AS for fjorten dagar sidan, har det spreidd seg ei stikkande lukt rundt anlegget. Men den skal no verta borte, lovar dagleg leiar Jostein Berland.
? Me har fått eit firma til å fjerna slammet som var i botn av tankane, som lukta kjem frå, seier han til Strilen.
Dette arbeidet startar alt i morgon, torsdag, og skal vera gjort på under ei veke. Slammet vert sendt til eit mottak for spesialavfall i Holmestrand i Vestfold.

Tilgang til luft
Då tanken eksploderte, vart innhaldet spreidd rundt i anlegget, og det er dette slammet som no skal bort.
? Det er når dette kjem i kontakt med luft at lukta utviklar seg, seier Berland.
Han beklagar overfor naboane, men opplyser ay gassen som dannar seg, skal vera ufarleg.

Nytt anlegg
Berland opplyser og at Vest Tank AS har avtale med eit stort, internasjonalt oljeselskap om å å satsa 66 millionar kroner i Sløvåg. Då skal ein ta i bruk dei store tankane til mellomlagring av oljeprodukt. Viss dette kjem i stand, skal ein få til ei løysing som fjernar all lukt frå anlegget i Sølvåg, seier Berland.
Men skal ein få til denne investeringa, må ein kjøpa litt meir areal frå Gulen og Masfjorden Utbyggingsselskap, og så langt har denne avtalen ikkje gått i orden trass i at Vest Tank har akseptert vilkåra, seier Berland.