Skal hjelpa med valet av rett yrke

Om du har tenkt å unngå å vera evig student, eller i alle fall unngå å velja feil yrkesretning, så bør du ta turen innom yrkes- og utdanningsmessa i Nordhordlandshallen den 29.-30. november.
Der har nemleg bedrifter og skular i Nordhordland gått saman for å hjelpa ungdommen å sortera alternativa for framtida si. Utstillarane, 44 i talet, er både skular, kommunar og bedrifter, og dei aller fleste har lokal tilknyting.
? Yrkeslabyrinten i Vestlandshallen og utdanningsmessa i Arenum i Bergen vert ikkje like treffande for ungdom her i regionen. Denne messa er tilpassa med lokalt næringsliv og bedrifter, seier Jo Tømmerbakke, som er rådgjevar på Kaland skule.
? Me kjem til å trenga mykje lokal arbeidskraft her ute i åra som kjem, og ungdommen her ute er priviligerte, seier Vivian Kårbø, rådgjevar ved Ostereidet ungdomsskule.

Foreldra bør vera med
Å velja i kva retning ein vil gå etter ungdomsskulen er ikkje alltid så lett.
? Ein av fire vel faktisk feil. Etter eit år på vidaregåande tenkjer dei «Søren pitle, no har eg vald feil» og så må dei bytta, fortel Kårbø.
Elevane sine skuleval er ofte prega av at det er vanskeleg å få oversikt over alternativa, at perioden fram mot søknadsdato vert hektisk og intensiv, og fleire vel basert på kva som er mest populært. Rådgjevarane som har vore med i planlegginga av messa legg vekt på kor viktig det er at elevane tek turen til messa alt som niandeklassingar, og aller helst saman med foreldra.
? Det er viktig at foreldra er med borna. Då kan fleire plukka opp informasjonen, og det er lettare å diskutera skulevalet heime etterpå, seier Kårbø.

Årets elevbedrift
På messa vil det verta høve til å snakka med framtidige arbeidsgjevarar, lærarar, lærlingar og rådgjevarar.
? Det er kanskje lettare å snakka med elevar og lærlingar, ungdom som ikkje er så mykje eldre enn dei sjølve, seier Tømmerbakke.
Til messa kjem og elevbedrifter til å ha utstilling, og det vert kåring av årets elevbedriftsprisar.