Skal skyta rakett i midnattssol

Saman med tretten norske og seks internasjonale studentar skal Rolf Erlend Sleire frå Dalsøyra vera med på å skyta opp ein rakett i sommar. Ungdommen frå Gulen er nemleg plukka ut til å vera med på rakettforsking på Andøya Rakettskytefelt.
? Det vert spennande, eg gler meg, seier Rolf Erlend Sleire til Strilen.

Skule i ferien
På leiren får Rolf Erlend og høve til å bada i iskaldt sjøvatn som heldt maksimalt 10 grader. Han får oppleva midnattssol og treffa mange nye menneske. Mesteparten av leiropphaldet går likevel med til realfag og skule. Leirdeltakarane skal læra om avanserte radarsystem og måleinstrument. Dei vil møta både praktiske og teoretiske problem knytt til ei avansert rakettoppskytning.

Ekte oppskytning
European Space Camp har som mål å visa korleis romfartsforsking og realfag faktisk vert nytta i kvardagen. Ungdommane får og sjå kva arbeid som ligg bak ei ekte rakettoppskyting. I ei veke er det ungdommane mellom 17 og 21 år som styrer på oppskytningsfeltet på Andøya i Nordland. For å få til ei vellukka oppskytning, må dei klara å samarbeida om å løysa avanserte problem.

Høgt nivå
Leiren heldt eit høgt fagleg nivå, og både professorar og spesialistar gjev foredrag om romfart og realfag. Foredraga skal vera meir spennande og krevjande enn det deltakarane har vore borti før. Leiren har eksistert i 11 år, og talet på søkjarar har aldri vore større enn i år. Rolf Erlend er glad for at han kom gjennom nålauga og vart ein av tjue heldige som får reisa til Nordland i slutten av juli.