Skårar på fulle byhotell

? Det har skjedd fleire gonger i det siste at me har innlosjert folk som eigentleg skulle bu i Bergen. Ein kveld sendte dei bortimot 15 menneske frå Bergen, og me hadde nesten heilt fullt frå før, seier Knut Ove Larsen, dagleg leiar ved Kjelstraumen Brygge.

Stor pågang
Larsen fortel at dei tek imot det dei kan, og endå litt til. Eit skipsmannskap fekk tilbod om flatsenger rundt omkring på Kjelstraumen Brygge, og tok imot tilbodet.
Turistar og handelsreisande får nyss om Kjelstraumen gjennom mellom anna turistinformasjonen i Bergen og Knarvik. Spesielt Westland Hotell er flinke til å senda folk vidare til Austrheim om dei sjølve ikkje har rom, meiner Larsen.
? Det har faktisk skjedd at me har sendt folk andre vegen og, altså til Westland når me sjølve har fullt, sier Larsen.
Han har ikkje inntrykk av at tilreisande tar skrekken av lange avstandar.
? Dei fleste er positivt overraska over standarden på hyttene, naturen og kor fint me har det her ute, seier Larsen.
Ein del av dei tilreisande har til og med vorte verande lenger enn planlagd.
? To engelske par var her i fire og seks døger, heller enn den eine overnattinga dei skulle ha i utgangspunktet. Det forundrar meg ikkje at dei vert verande når dei får vita om dei flotte naturopplevingane me har har, seier Larsen.
Kjelstraumen Brygge har hatt ein utruleg forsommar og sommar. Dei har hatt strålande dekning heilt sidan pinse, og tala ser bra ut langt utover sommaren, fortel Larsen.
? Det er veldig kjekt at me kan få gje folk tilbod om overnatting her ute, slik at folk får auga opp for regionen,

Kunne bygd ut
Også på Alver Hotell i Alversund nyt dei godt av fulle hotell i Bergen.
? Me har vore fullbooka svært ofte denne månaden, og sender folk vidare der det er plass, seier Kari Nelson.
Ho er resepsjonssjef på Alver Hotel og står midt i arbeidet med å skaffa turistar husrom.
? Denne månaden er det slik at dei forretningsreisande ikkje har tatt ferie enno, samtidig som turistane byrjar å komma. Det er vanleg at det er fullt i Bergen og omegn no, seier ho, og legg til at det same gjeld for Westland Hotel på Lindås.
Hotella har eit samarbeid med Turistinformasjonen i Bergen, og sender kvar morgon inn rapport for dagen og kommande veke over kva rom dei har ledige.
Slik finn turistar fram til overnattingsstader litt ute i distrikta også.
? Me har hatt fullt mange gonger, og kunne nok bygd ut hotellet fleire gonger med den etterspurnaden. Men når me har fullt, ringer me rundt til campingplassar og liknande for å finna plass til folk, seier Nelson.