Skitrekk dreg opp hytteprisane

At interessa for hyttetomt i Stodalen nærmast har gått i taket på grunn av skitrekket, kan stadfestast av Øystein Bjørnsen, som driv Stordalen Fjellstove.
? Det var akkurat som å slå på ein brytar! Då det vart kjent at det skulle koma skitrekk, vart me nedringte av folk som spurde om det var hyttetomter å få kjøpt, seier Bjørnsen.
Bjørnsen har inntrykk av at det er venteliste hjå fleire grunneigarar som har tomter på gang. Han viser til ledige tomter blant anna på Librotet, men der er det så langt ikkje laga skikkeleg veg fram.

Venteliste
Som eigar av Stordalen Fjellstove, merkar også Hans Henrik Fanebust auka interesse for hyttetomter i området.
? Dei siste tomtene me selde, gjekk for mellom 180.000 og 190.000 kroner i fjor. No har eg fanga opp at det har skjedd vidaresal for kring 100.000 kroner ekstra. Noko kan sjølvsagt tilskrivast skitrekket. Men ein skal hugsa på at det også har vore stor generell prisauke på slike tomter den siste tida, seier Fanebust.
Han har kommunal godkjenning for åtte-ti tomter til. Desse vert utskilde så snart snøen forsvinn, slik at dei kan vera byggjeklare til sommaren. Fanebust seier at han har interessentar til desse tomtene, som er dei siste fjellstova vil selja i denne omgang.  
Grunneigar Oddvar Østerbø på Høyanger-sida kan ikkje seia at han har merka ekstra pågang grunna skitrekket.
? Men skitrekket er heilt klart positivt for området, seier Østerbø. Saman med andre grunneigarar jobbar han med å få klar 40-50 nye tomter.
? Me har ikkje hatt ledige tomter dei par siste åra, men me har kring 30 på venteliste. No håpar me å ha klar dei første tomtene, i Bjørkelia, til sommaren. Det vert sjølveigande tomter med avkøyring frå Krokevassdammen, seier Østerbø.
Prisen på tomtene vert kring 500.000 kroner med p-plass, straum, vatn og felles avløpsanlegg.
? Eg har ikkje merka negative reaksjonar på dette prisnivået, seier Østerbø.

? Pluss 100.000 kroner
 ? Så vidt eg veit er det ikkje seld hyttetomter i Stordalen etter at skitrekket vart opna. Men eg vil tippa at trekket dreg opp tomteprisen med minst 100.000 kroner, seier Bjørnar Vik.
Han har laga reguleringsplanane for dei fleste hyttefelta i området, både på Masfjord-sida og over grensa til Høyanger.
Når Strilen opplyser at enkelte hyttetomter i Stordalen vart selde for 70.000 kroner før skitrekket kom, har Vik denne kommentaren:
? Den tid er nok forbi! Frå no av reknar eg med at det er vanskeleg å få seg hyttetomt i Stordalen til under 250.000 kroner, i alle høve dersom det er veg fram, seier Vik.