Sko-funn kan gje ny peikepinn i leitinga

? Eg synest dette er ein overveldande respons, men eg er ikkje overraska. Eg veit at folk stiller opp i slike situasjonar, sa lensmann Kjell Idar Vangberg etter å ha tildelt nærare 25 båtar leiteområde i Mangerfjorden og Radfjorden.
Like før klokka 12.30 kunne dei første småbåtane leggja ut. Blant dei var Vidar Grindheim med ein Askeladden 15 fotar.
? Eg veit kven den sakna er, ettersom eg har truffe han og snakka med han, sa Grindheim til Strilen før han la ut.
Både Grindheim og fleire Strilen snakka med, gledde seg over det gode frammøtet, blant anna Sigfred Storheim, Ronny Titland, Raymond Storheim og Kjetil Vågenes. Også folk frå Lindås og meland brannvern deltek i leitinga, som vert koordinert frå politibåten «Kjølen».
Det vert no leita på begge sider av fjorden både i Mangerfjorden og Radfjorden. Det vert leita både i sjøen og i strandsona. Vangberg reknar det som ganske sikkert at mannen har drukna, men til no er ingenting funne. Det er fastslått at redningsvesten som vart funnen laurdag, ikkje har vore brukt.
Første delen av leiteaksjonen vert avslutta kl. 15, men nye folk startar leiting klokka 17 etter å ha kome heim frå jobb.
Fleire av dei som deltek, er kjende av den sakna.
Mannen forsvann natt til laurdag då han skulle køyra heim frå Garveriet i Isdalstø, til Håland, i ein liten båt. Båten vart laurdag morgon funnen ved Kviste. Mannen er frå Stord, men var på ferie på Radøy, der sambuaren er frå.
Folk som har opplysningar, kan kontakta politibåten på tlf. 90520070.
? Så langt er det ikkje meldt om funn, seier Sigmund Vestrheim på politibåten like etter klokka 14.00.