Skral respons på skotpremie

? Til no i år har me skrive ut skotpremie for ein raudrev, og i fjor kan eg ikkje hugsa at me fekk inn eit einaste dyr. Eg trudde ikkje skotpremien vart innført før i år, seier politiførstebetjent Bernhard Krokås ved Masfjorden lensmannskontor til Strilen.
Krokås trur ikkje den beskjedne jakta kjem av at det ikkje finst rovdyr i kommunen, men at jegerane er borte.
? Dei som dreiv med jakt, er enten døde eller har slutta, trur han.

Meir mink
Skotpremien vart gjeninnført fordi ein hadde sett auka bestand av dei rovdyra det gjeld.
? Særleg minken har auka, og den gjer skade på fuglelivet. Eg har ved sjølvsyn sett at han tek egg frå ternene, seier Krokås.
Ei lita øy i kommunen er freda som fuglereservat for ternene. Der var det før fullt i fugl, men no er der ingen, seier Krokås.
Han meiner bestanden av mink har auka dei åra det ikkje har vore skotpremie. Den vart fjerna av politikarane i 2001.

Lite kjent
? Me innførde skotpremie igjen fordi desse rovdyra gjer skade, enten på husdyr eller på anna vilt, men kanskje har me vore for lite flinke til å gjera det kjent at der er skotpremie å få, seier Jan Otto Daae, leiar i utval for vilt og fiske i Masfjorden.
Han er samd med Krokås i at det også er færre som driv med jakt på desse dyra no enn tidlegare.
Skotpremien i Masfjorden er 300 kroner for ein raudrev, 200 kroner for ein mår og 100 kroner for ein mink. Totalt er det avsett 10.000 kroner til skotpremiar. Det er ulike jakttider på dei ulike dyra.