Skralt busstilbod for funksjonshemma

Denne veka aksjonerte Norges Handikapfor-bund for å få eit betre kollektivtilbod for funksjonshemma. Men i Nordhordland var det ingen aksjon.
? Det kjem av at her er tilbodet så dårleg at det rett og slett ikkje er nokon vits å aksjonera, seier Anne-Berit Kolås til Strilen.
Ho bur på Frekhaug og er nestleiar i regionstyret i Handikap-forbundet.
? For det første har HSD berre nokre få bussar som er tilgjengelege for folk med rullestol, seier Kolås.

Manglar rampe
Det andre problemet er at nesten ingen busstopp har påkøyringsrampe.
? Dermed vil det ikkje vera til så stor hjelp om det kjem bussar med inngang for rullestol. Utan rampe kjem ein seg ikkje inn i bussen likevel, forklarar Kolås.
På den nye bussterminalen på Frekhaug er det påkøyringsrampe, men likevel er ikkje Kolås nøgd.
? Sjå her er det ein kant likevel. Sjølv om han ikkje er så høg, er det nok til å laga problem for rullestolen, viser ho.
Kolås tykkjer det er synd at når utbyggjar først gjer noko for å leggja til rette for funksjonshemma, vert det ikkje gjort godt nok.
? Dette burde vera ei enkel sak, meiner ho.

Kom inn
Medan Strilen og Kolås snakkar, kjem ein av HSD sine nye minibussar inn på terminalen. Me spør sjåføren om me kan få ta eit bilde for å visa at ho ikkje kjem inn i bussen med rullestolen. Men der tek me feil.
? På desse bussane er det påkøyringsrampe bak, svarar bussjåføren og viser.
? Dette visste eg ikkje, seier Kolås etter at ho har testa rampen.
Rett nok var døra litt smal, men med hennar vesle rullestol kom ho inn. Anne-Berit Kolås meiner målet må vera at funksjonshemma har like godt kollektivtilbod som funksjonsfriske. Slik er det absolutt ikkje i dag. Og slett ikkje i Nordhordland.
? Her er me stort sett avhengige av å køyra sjølve, eller å leiga drosje som kan ta rullestol.
Ho innser at det vil vera langt fram før alle bussar og busstopp er tilrettelagde for funksjonshemma, men håpar at arbeidet i det minste snart kjem i gang. For til no har lite skjedd.