Skuldar Helse Bergen for tjuveri

Uttalen er underteikna av regionrådsleiar Håkon Matre og Lovisa Midtbø på vegner av rådmennene. Ernst Horgen skriv under for legane og Ørnulf Lillestøl for Samarbeidsutvalet for legevakten.
Bakgrunnen for dei uvanleg krasse ordelaga er Helse Bergen sitt styrevedtak om å redusera bemanninga i ambulansetenesta i Nordhordland. Lokalt vert dette oppfatta som at legar ved legevakta i Knarvik skal gå inn som sidemenn dersom eine ambulansen berre har eitt vaktmannskap på kveld og natt. Skulle det skje, vil legevakta i Knarvik vera utan lege den tida den eine legen som har vakt, er med ambulansen.
«Det er svært uvanleg at ein kan meina at andre sine tilsette (kommunelegane) skal gjera oppgåver som ligg hjå føretaket», heiter det i uttalen. Det er dette som i uttalen vert kalla tjuveri av både personell og pengar frå kommunane.
Frå lokalt hald vert det også reagert sterkt på at kommunelegane og ordførarane i Nordhordland ikkje er involvert eller førespurde. Vedtaket som er fatta, vil skada ambulansetenesta og legevakta, og dei skadelidande vil vera innbyggjarane i regionen, heiter det i uttalen. Brevete avsluttar med at Helse Bergen er pålagt å driva samarbeid, ikkje maktarroganse.