Skuleopprør førte ikkje fram

Før møtet var Synnøve Solberg ein av elevane som skreik høgt og vifta med parolen «Nei til storskule». Utanfor inngangen til Knarvik Sjukeheim, der møtet vart halde, hadde det møtt opp eit par hundre elevar og foreldre. Spesielt elevane gav kraftig lyd frå seg.
Synnøve Solberg fekk også sjansen til å kviskra nokre ord i øyra på både Terje Hugo Aarvik og andre folkevalde.
? Tenk på folk og ikkje berre på pengane! var det eg sa til dei, opplyste Synnøve til Strilen.
Seinare hadde ordførar Tove Linnea Brandvik både lytta til elevar og foreldre og tatt imot 800 underskrifter frå aksjonen.

«Slaget tapt»
Men fire timar etter møtestart var «slaget tapt». Høgre og Frp nådde ikkje fram med ei klar formulering og forsikring om ny skule i Alversund. Heile kommunestyret samla seg deretter om ei mellombels overføring av elevar frå Alversund til Knarvik frå hausten 2007. På permanent basis vil kommunestyret overføra Leiknes-elevane til Ostereidet ungdomsskule, også frå hausten 2007. Men det er ei krinsendring som etter lova må ut på høyring blant anna hjå FAU.
Vedtaket er i grove trekk i tråd med framlegget frå formannskapet. Ei endring er at vurderinga av situasjonen i Knarvik og Alversund skal koma alt i 2010, ikkje i 2012. Men uansett var det ein gjeng skuffa foreldre som følgde heile debatten og som etter møtet møtte lokalpressa:
? I Knarvik er me ikkje nøgde med eit slikt vedtak om å flytta Leiknes-elevane til Ostereidet, var reaksjonen frå Nina Grøttveit straks etter møtet.

«Berre jobba vidare»
Ein av dei aktive i folkeaksjonen i Alversund, Arne Sæbø, innsåg at slaget var tapt i første runde. Men han meiner krinsen må jobba vidare og utarbeida planar for ein ny ungdomsskule i Alversund.
? Finn i så fall ei anna tomt enn i industriområdet i søre Alvermarka, var rådet frå Karl Johan Olsen, tidlegare Ap-politikar i Knarvik Han minna og om at nye politikarar innan 2010 kan koma til å gjera nye vedtak enn det som nyss var gjort. Olsen viste til at han sjølv hadde vore med på å gjera vedtak om 1-9 skule i Seim. Og kor er den skulen? spurde Olsen.
? Me ser at me ikkje har nådd fram no. Men frå FAU si side er me nøgde med at politikarane vil dela 1-10 skulen i Alversund i to, kommenterte leiar Nina Bauge. Ho varsla at FAU vil ha eit møte før ein seier noko nærare om kva neste steg vert frå foreldra si side,