Slår ring rundt skule og barnehage

Det har vore hærverk rundt Flatøy skule og barnehage dei siste vekene. No vert vaksne oppmoda om å passa på. Folk skal ha observert store gjengar i området rundt skulen og ballbingen bygda har fått hjå Trond Mohn, både i helger og på kveldar, fortel rektor Marit Aamodt ved Flatøy skule. Ungdomar skal også ha køyrd med krossyklar inne i ballbingen. Når vaksne har snakka til dei, skal dei ha sagt at dei ikkje bryr seg om bingen vert øydelagd, fordi Trond Mohn har så mykje pengar at han kan kjøpa ein ny ein, fortel rektoren.

Ølflasker og sneipar
? På måndagar må me gjerne rydda vekk tomme ølflasker, sigarettsneipar og anna boss, fortel Aamodt. Ho fortel også at dei finn benkane på skuleplassen kvelva og kasta rundt omkring.
Ho synest det er veldig synd at folk byrjar å øydeleggja ballbingen.
? Dette er veldig respektlaust i forhold til denne flotte gåva me har fått. Det er også born som seier dei kvir seg til å bruka skuleplassen og ballbingen på kveldstid, seier rektoren.
Skulen støttar fullt ut flygebladet frå Flatøy Bygdelag og Flatøy Kvinne og Familielag, som oppmodar vaksne til å leggja turen innom skule- og barnehageområdet på kveldstid og i helgene. I flygebladet, som er sendt ut til husstandane på Flatøy, skriv laga mellom anna at dersom det er tett med vaksne i eit område, verkar dette preventivt.

? Kjekt med ballbinge
Elevane Christina Austegard og May Britt Birkeland synest også det er synd at folk øydelegg ballbingen og går laus på området rundt skulen. Dei viser fram skadar på fotballnett, oppskrapa skilt, svidde plankar og innrissingar i treverket. Dei peikar også på sigarettpakkar og anna boss som ligg på bakken.
? Det er ikkje noko gøy når det vert så stygt her, seier Christina Austegard.

Mykje brukt
Dei to jentene set stor pris på ballbingen, og seier det er kjekkare i friminutta etter at den kom på plass.
Dei håpar at dei som driv og øydelegg på denne måten, skal slutta med det.
? Det var Flatøy Kvinne og Familielag som tok opp denne saka, og eg støttar innhaldet i flygebladet, seier Dag Gjert Thomassen, leiar i bygdelaget.
Han seier at ballbingen vert mykje brukt av borna i området, og at det heldigvis ikkje er snakk om store skadar.
Laget skal drøfta saka nærmare på eit møte over helga. Blant tiltaka dei vurderer er å setja opp eit skilt med forbod mot sykling i ballbingen.
? Det er utruleg dumt dersom noko folk har bygd opp på dugnad, skal verta øydelagt av hærverk, seier Thomassen.
Klarar dei å få mange vaksne til å leggja turen innom området, har han god tru på at tilhøva vil verta betre.