Slik kan MASFJORDBRUA verta...

– Eg har ikkje fått tid å sjå på teikningane, men vegvesenet har laga eit notat der både hengebru og flytebru er med. Det er godt at dette no har kome på bordet, sjølv om det er er litt forseinka.

Det seier tidlegare ordførar Håkon Matre, som har hatt kontakten med Vegdirektoratet si bruavdeling. Han har no oversendt både notat og alle skisser til rådmannen i kommunen for vidare behandling.

«Gamle-ordføraren» i Masfjorden meiner kommunen bør stå sterkt når ein går vidare for å få gjennomslag for prosjektet.

– Når Hordaland fylkeskommune kan bidra i eit prosjekt som Jondalstunnelen til 800 millionar kroner, må det kunna forsvarast like godt å delta i denne brua, seier Matre.

Hengebru
Når det gjeld pris, har Statens vegvesen sine ekspertar brukt Dalsfjordbrua som grunnlag for ei hengebru.

Dalsfjordbrua er under bygging med eit hovudspenn på 523 meter. Ei hengebru over Masfjorden vil ha tilnærma same utforming av stålkasse, tårn og forankring som brua i Sunnfjord.

Hovudspennet  Masfjorden vert kring 710 meter, og kabellengda vert kring 1200 meter med ei vekt per kabel på 150 tonn.
Fundamentering for brutårn kan spela inn på den kostnaden vegvesenet sine folk har rekna ut. Dersom spennvidda må aukast, vil det også auka kostnaden.

Eller flytebru?
Skal det satsast på flytebru, meiner vegvesenet ein kan bruka Bergsøysundbrua som grunnlag for kostnaden. Det er den andre flytebrua som vart bygd her i landet, opna to år før Nordhordlandsbrua.

Bergsøysundbrua mellom Aspøya og Bergsøya i Møre og Romsdal har nokså nøyaktig same lengde som ei flytebru over Masfjorden vil få.
Stål for 330 millionar kroner utgjer den største delen av kostnaden dersom det vert bygd flytebru. Betong i flytepontongane vil koma på kring 70 millionar.

Då Bergsøysundbrua vart bygd for 20 år sidan, var prislappen kring 200 millionar kroner.

Forprosjekt
– Bruavdelinga i Vegdirektoratet har hatt det svært travelt med prosjekt som det er løyvd pengar til. Difor var det ei forseinking for Masfjordbrua, slik at me ikkje fekk fram planane for det gamle fylkestinget, opplyser Matre.

Kommunen har engasjert Helge Hopen, også innleigd for å jobba fram Nordhordlandspakken, for å få klart eit forprosjekt for Masfjordbrua.

– Når geologiske undersøkingar er unnagjort, håpar eg at forprosjektet kan vera klart i første kvartal i 2012, seier Matre.

Han overlet no til nye politikarar i kommunen å kjempa fram prosjektet. Sjølv om prislappen har vorte litt høgare enn Matre hadde rekna med, har han god tru på å få politisk gjennomslag.

– Konsesjonskraftmidlar frå fylket må kunna inngå i finansieringsplanen. Masfjorden kan nok og bidra, men i eit så stort posjekt vert nok det eventuelt berre i mindre målestokk, seier Matre.