Slik kan Matre verta!

Det vanka både bifallande brumming under vegs og applaus då folk frå konsulentfirmaet Rambøll Norge AS onsdag la fram planar for korleis Matre kan utviklast i åra framover. Utgangspunktet er å skapa vekst i bygda, slik at folketalet kan auka.
Både ved hjelp av kart og ein animert videofilm viste Arne Kristian Kolstad korleis Rambøll tenkjer seg utvikling på Matre, noko han tykte var eit spennande oppdrag.
? Då kommunen spurde om me kunne tenkja oss i gjera dette prosjektet, tenkte me: «Dette må me vera med på», fortalde Kolstad.

Sentrum
Eit levande bygd treng eit levande sentrum. Rambøll vil satsa på eksisterande sentrum og vidareutvikla dette. Dei vil flytta Bjørn West-museet dit. I tillegg vil dei ha eit kafetilbod, gjerne på hotellet som ligg der i dag, og dei vil flytta kinosalen til kaien. Småbåthamn og gjestebryggje ligg og inne i planane.
? Me ser for oss eit sentrum der dei ulike aktivitetane spelar saman, sa Kolstad.
Ein open plass med ei utescene nede ved kaien hadde dei og teikna inn.

Ved E-39
? Me treng fleire besøkjande for å overleva. Det får me ikkje der me ligg no.  Viss Bjørn West-museet vert flytt opp til E 39, er det større sjanse for at tilfeldige passerande finn vegen innom i tillegg til busslastene som kjem no, sa Alf Solheim, som no har ansvar for drifta av museet.
Fleire andre som hadde ordet på folkemøtet, meinte og at butikk, kafe og andre sentrumsfunksjonar burde byggjast opp  i sandtaket. Eit lite opplevingssenter, der både BKK og Havbrukstasjonen kunne presentera seg, var og framme som ein ide.
Diskusjonen om kor sentrum skal liggja på Matre, peikar seg difor ut som eit viktig tema i prosessen, som skal munna ut i ein ny reguleringsplan på Matre.

Sykkelkross
Bruken av sandtaket vert uansett eit sentralt tema. Rambøll meinte det kunne byggjast nokre næringsbygg der for verksemder som vil etablera seg. I øvre del av området ville dei byggja utleigeleilegheiter. Området oppover langs elva kunne nyttast til sykkelkrossbane, ballbane eller andre fritidsaktivitetar.
? Og så må BKK rydda opp i rotet sitt, slik at ikkje det er det første folk ser når dei kjem til Matre frå nord, vart det sagt frå salen.

Kraftspela
Folkemøtet var godt besøkt, og 50-60 personar var til stades. Straks etter møtet var slutt, sette arbeidsgruppa som seg ned for å oppsummera innspela. Rambøll skal så jobba vidare og presentera eit revidert framlegg under Kraftspela i august. Dette må så ut på høyring og gjennom den vanlege saksgangen fram til at kommunestyret kan vedta ein reguleringsplan.
I tillegg må det lagast ein handlingsplan, der dei ulike tiltaka vert tidfesta, og der det vert avklart kven som skal ta kostnaden. Rambøll såg for seg privat medverknad i tillegg til kommunen.
? Og målet med alt dette er å få vekst i bygda, understreka Ørnulf Lillestøl i arbeidsgruppa.
I denne gruppa sit og Frode Langhelle, driftssjef Anne Kristin Rafoss og prosjektleiar Beate Mæsel. På møtet understreka ho at samarbeid og positiv innstilling er viktig får å få noko gjort.

Lysløype
Eit spenstig framlegg i Rambøll sine planar er å laga ei lysløype på Matre, som endar i ei lysnål. Lysløypa starta på transformatoranlegget til BKK, som Rambøll vil lysa opp på kvelds- og nattestid. Så følgjer lysløypa vegen forbi Havbruksstasjonen, over brua og ned til kaien. Formasjonen endar så i ei lysnål på Matresøya. Denne lysnåla er ein lysskulptur som skal stå som ein lyskjegle på toppen av øya. Rundt den er det planlagt ein platting, og gjerne med ei trapp frå sjøen og opp til skulpturen. Arne Kristian Kolstad meinte ein slik konstruksjon kunne gje Matre særpreg, og samstundes symbolisera at det vert produsert elektrisk straum på Matre.
Folk tykte framlegget var spennande, men tvilte på om det ville verta realisert.

Steingjerde og bruer
I Rambøll sitt framlegg vert fotgjengarfeltet over E 39 flytt til sandtaket. Ein tenkjer seg så at to steinbruer kan kryssa elva, slik at gåande og syklande  kjem seg ned til noverande sentrum skule og barnehage.
Rambøll vil også byggja steingjerde for å markera skiljet mellom landbruk og busetnad.
? Steingjerde har lange tradisjonar her, sa Kolstad.
Langs vegar og gangvegar vil dei planta tre og buskar.
? Kven skal halda alt dette ved like? vart det spurt.
Her måtte det frivillig innsats til, meinte prosjektleiar Beate Mæsel.