Slik vert Markavegen

? Det er kjekt å vinna ein slik konkurranse, seier dagleg leiar Karl Atle Taule i Ing. Taule AS.
Meland utbyggingsselskap lyste ut ein konkurranse for å finna det beste prosjektet for utbygging av Markavegen på Frekhaug. Akitektfirmaet Ark-plan vann førstepremien på 50.000 kroner, og no tek Ing. Taule sikte på å starta bygging på området før årsskiftet.
? Det vert truleg tjue bueiningar, fordelt på to tomannsbustader og fire firemannsbustader, fortel Taule.
Bustadane vert knytte saman med carportar.
? Eg reknar med at me kjem til å selja dei fleste bustadane på førehand, seier han.
Ing. Taule AS er eit relativt nystarta firma som byggjer Systemhus i Nordhordland og Gulen. Firmaet har prosjekt på gang i Austrheim og Radøy. Til utbygginga på Frekhaug går Ing. Taule saman med to andre Systemhus-forhandlarar.
? Målet er at dei første kan flytta inn i Markavegen til våren neste år, seier Karl Atle Taule til Strilen.
Bakgrunnen for at Meland utbyggingsselskap lyste ut ein konkurranse, var mellom anna å auka dei designmessige kvalitetane i bustadprosjekt i kommunen.