Slik vert tverrsambandet

– Me hadde forprosjektet oppe i styret torsdag, og dette håpar me å presentera for leiinga i fylkeskommunen før jul, seier Kjell Kristensen til Strilen.

Kristensen er nestleiar i Samband Vest AS og eldsjela bak ideen om å byggja veg frå nordre Askøy til Radøy og oppretta ferjesamband frå nordre Askøy til Øygarden.

– Me har fått laga skisser av vegtrasear, berekna stigningstilhøve på vegane og kostnadsoverslag, fortel Kristensen.

Det er konsulent Helge Hopen som har laga forprosjektet. Ikkje røpa Men Kristensen ønskjer ikkje å røpa meir før saka har vore presentert for fylkesleiinga og dei berørte kommunane Øygarden, Askøy, Meland og Radøy.

– Me kjem til å innkalla til ein pressekonferanse i januar, seier han. Kristensen er overtydd om at eit slik tverrsamband vil ha svært mykje å seia for næringsutviklinga i Nordhordland, og han meiner det vil vera mykje betre å satsa på denne vegen enn Nyborgtunnelen.

– Kor mange nye arbeidsplassar vil den skapa? spør han.

Under sjøen Både sambandet mellom Askøy og nordre Holsnøy og vidare frå Meland til Radøy er tenkt løyst med to undersjøiske tunnelar, den djupaste 200 meter under havflata.

– Dermed er det ingen hus eller hytter som vil verta berørte av vegprosjektet, og eg kan berre sjå positive verknader av dette sambandet, seier Kristensen.

Ordførar i Meland, Nils Marton Aadland, er styreleiar i Samband Vest AS, men Strilen lukkast ikkje å få kontakt med han i går.