Slo to kvinner, slepp fengsel

Mannen tok seg inn i huset ved å knusa ei altandør, og sparka og slo laus på dei to kvinnene. Valdstilfellet har mellom anna gjeve den konsekvens for kvinna som budde der, at ho i dag ikkje tør å ha bustad på gateplan.
Nordhordland tingrett har lagt vekt mellom anna på ei legeerklæring som viser at kvinna som budde i huset hadde fått begynnande blåmerke på venstre skulder, høgre arm, høgre hofte og høgre lår. Dette stemmer med forklaringa frå kvinna om at ho vart slått og sparka fleire stader på kroppen.
Mannen gjekk også laus på sambuaren sin som var i huset, og ei legeerklæring som vart lagt fram i retten viser at også ho vart påført begynnande blåmerke, i høgre alboge og venstre legg. I tillegg var kvinna øm og opphovna, noko som stemmer med hennar forklaring om at ho var slått og sparka fleire stader på kroppen.
Etter rettspraksis skal det i slike saker reagerast med fengsel av ei viss lengd. Men retten viser til at det har teke fleire år før saka kom for retten, og at mannen ikkje kan lastast for dette. Det at mannen ikkje tidlegare er domfelt for vald, samt nokre andre tilhøve, gjer at han slepp fengsel utan vilkår.