Slutt på bilvrak hjå NGIR

Siste sjanse for levering er altså på tysdag. Skal folk deretter levera bilvrak, må dei kontakta bilforhandlarane for å få opplysningar om kva dei skal gjera, heiter det i ei melding frå NGIR.

Får ikkje vederlag
Årsaka til at NGIR stoppar ordninga med mottak av bilvrak, er at det frå nyttår vert innført produsentansvar for kjøretøy. Bilimportørane har organisert vrakordninga gjennom selskapet Autoretur AS.
? NGIR har, som mange andre oppsamlingsstader, fått eit tilbod frå Autoretur om å oppretthalda mottak av bilvrak på vegner av dei. Dette tilbodet kan diverre ikkje aksepterast. NGIR vil berre få oppgjer i form av ein prosentdel av skrapjernsverdien av bilvraka, noko som inneber sterkt reduserte inntekter, samt at NGIR ber all økonomisk risiko i samband med varierande stålprisar. Vederlag for arbeidet med miljøsaneringa (m.a. tapping av miljøfarlege væsker) fell vekk, heiter det i meldinga frå NGIR.

For dårleg tilbod
Fram til no har NGIR fått 600 kroner frå SFT per vrak dei tek imot, men dette tilskotet fell vekk frå nyttår, opplyser driftsleiar Rune Ones i NGIR. I tillegg har dei fått litt av skrapprisen. Det nye tilbodet om berre ein prosentdel av skrapprisen vert for lite og for usikkert, seier Ones, som legg til at dei fleste mottaka av bilvrak i landet no stoppar denne verksemda.
? Mottak av bilvrak er heller ikkje ei oppgåve NGIR er pålagt å gjera. Men me har gjort det for å gje service til innbyggjarane og fordi det var nokre kroner i det, seier Ones.
Han ser at det å stoppa mottak av vrakbilar inneber ulemper for dei bileigarane som vil levera bilvrak, men seier at NGIR ikkje kan halda fram på dei vilkåra som til no er lagt fram.
? Me har fått eit tilbod frå den nye returordninga, og har svara at tilbodet ikkje kan aksepterast. Dei har gjeve tilbakemelding om at dei ikkje vil gje meir, og då kan me ikkje gjera anna enn å stoppa mottaket, seier Rune Ones.

Vil finna nye tilbod
? Me vil gje nye tilbod om levering av bilvrak til folk i område der eksisterande mottak ikkje vil halda fram, seier Hroar Braathen i Autoretur AS.
Han meiner at ein del eksisterande mottak no krisemaksimerer for å pressa fram betre avtalar.
? Med dei stålprisane som er i dag og som me forventar i framtida, vil mottaka koma minst like godt ut av det med dei nye avtalene som med dei gamle, hevdar Braathen, som seier at prognosane tyder på ei fordobling av stålprisen i løpet av nokre får år.
Han kunne i går ikkje seia noko om kvar folk frå Nordhordland og Gulen skal levera bilane sine etter 2. januar, men 3. januar vil ei liste over mottak verta lagt ut på Autoretur si nettside.
Kravet til SFT er at det ikkje skal vera lenger til eit mottak for bilvrak enn 50 ? 70 km, men det kan og verta snakk om ei henteordning, seier Braathen.
Folk heilt sør i Nordhordland vil difor vera innanfor denne avstanden til eit eventuelt mottak i Bergen. Men det vert altså lagt ut ei liste over mottak av bilvrak den 3. januar.
Autoretur AS er eit returselskap som er etablert av bilimportørane for å ivareta deira ansvar for å ta hand om vraka kjøretøy.
Dei har gjort avtale med Stena Metall AS og Bilgjenvinning AS om sjølve gjennomføringa av returordninga.
? Målet til Autoretur er å gjennomføra returordninga på billegaste måte for bilistane. Det er eit non profit-selskap som altså ikkje skal betala utbyte til eigarane, seier Braathen.