Sluttar å lova gratis drinkar

Men også marknadsføring av gratis entre for damer, kan vera ulovleg, då i forhold til likestillingslova. Utestaden vil likevel halda fram med å sleppa damer inn gratis på visse tidspunkt, heilt til nokon klagar til Likestillingsombodet. Men dei tar altså ned den plakaten som reklamerer for gratis cocktail til damene.

Gratis cocktail
På den lett synlege, meterhøge plakaten ved baren på Harry, vert det opplyst at alle damer kjem inn gratis mellom klokka 22 og 23. I tillegg står det i store typar nedst på plakaten at damene også får ein gratis cocktail denne timen.
? Desse drinkane er både med og utan alkohol, opplyser dagleg leiar Gunnar Anthun. Alkohollova seier klart i kapittel 8, § 6a, at det er forbod mot å dela ut alkoholhaldig drikke til forbrukarar i marknadsføringsøyemed.
? Eg kan ikkje forstå at plakaten min skal vera ulovleg. Plakaten er ikkje marknadsføring, det er berre ei prisopplysing ved baren, seier Anthun. Han meiner bestemt at han kan selja varene til kva pris han vil. Og opplysningar om prisar må vera lov å gi, meiner han.

Plakaten må ned
Etter å ha ringt Prisdirektoratet og kontor for skjenkesaker i Bergen, ringer Anthun Strilen tilbake. Han har bestemt seg for å ta ned plakaten med det same. At han kan selja til dei prisane han vil, er korrekt. Men om han vil gje vekk noko gratis, kan han uansett ikkje nytta det i marknadsføring i form av ein plakat. Han vil ikkje risikera å mista skjenkeløyvet.

? Eg har hatt utallege skjenkekontrollar her gjennom kommunen. Ingen har sagt noko om plakaten. Hadde dei sagt det var ulovleg, ville eg sjølvsagt tatt plakaten ned, seier Anthun. Han seier at han heile tida har meint at plakaten er ei prisopplysing. ? Eg kan ta dei prisane eg vil for varene mine. Eg har berre ikkje lov til å reklamera for at noko er gratis. Men eg kan skriva i vinkartet mitt at noko er gratis på enkelte tidspunkt, seier Anthun. Om han kjem til å gjera det, har han ikkje tatt stilling til. ? Eg kan gje vekk alt om eg vil, berre ikkje marknadsføra det, seier Anthun.

Følgde ikkje opp
Strilen skreiv den 23. juli i år at å sleppa damene inn gratis kan vera lovstridig. Fungerande likestillingsombod Tone Rogstad Bjellaanes konstaterte med at eit slikt konsept braut med likestillingslova paragraf 3. Paragrafen seier at direkte eller indirekte forskjellsbehandling av menn og kvinner ikkje er tillete. For at Likestillingsombodet skal ta tak i saka, må dei få inn ei skriftleg klage.
Då Strilen gjorde dagleg leiar Gunnar Anthun merksam på dette i sommar, uttalte han at han måtte gjera noko med saka. Om han kom til å fjerna tilbodet, skulle han sjå nærare på.

? Eg kjem til å halda fram med tilbodet. Kvifor skulle eg ikkje det? Med mindre nokon sender klage, treng eg ikkje ta vekk tilbodet, seier Anthun no. Han har fått mange positive tilbakemeldingar på at damene slepp inn gratis, både frå menn og damer. ? Damene synest det er topp å koma inn gratis, og dei fleste menn synest det er supert med mange damer i lokalet. Han trur ikkje det er så mange som føler seg støtt av denne marknadsføringa, og har difor lita tru på at nokon melder det. ? Men dersom nokon melder det til Likestillingsombodet, og dei vurderer tiltaket som lovstridig, må eg jo ta det til vurdering, seier Anthun.