Solidaritet gav tur til Brasil

? Eg vart glad då eg fekk vita at det var meg som fekk vera med til Brasil, seier Robin Vågstøl til Strilen.
Han har nett fullført Meland ungdomsskule sitt solidaritetsløp, der startpengane går til barneheimen Lar de Padilha, som han skal besøkja i november, heilt sør i Brasil i delstaten Rio Grande do Sul.
Robin har visst ei stund at han var den heldige som får vera med på ein ni dagars tur til Brasil, der dei både skal sjå den barneheimen han har vore med på å samla inn pengar til og vera tre dagar i millionbyen Rio de Janeiro.

Søkte
Robin var ein av fleire elevar ved skulen som skreiv søknad til rektor, der dei skulle grunngje kvifor dei ønskte å vera med på turen, som Skolenes U-landsaksjon arrangerer.
? Eg skreiv at eg ønskte å reisa for å sjå korleis borna på barneheimen levde, seier Robin.
Kvifor nett han vart plukka ut, veit han ikkje. Kva han får sjå der nede, er han heller ikkje heilt sikker på. Men han trur det vert ein spennande tur.
Niandeklassingen har aldri vore utanfor Europa tidlegare.

Ein av tre
? Grunnen til at Meland ungdomsskule er vald ut til å vera ein av tre skular i landet som får senda ein elev og ein lærar til Brasil, er at me har vore aktive i Skolenes U-landsaksjon gjennom mange år, fortel Bente Corneliussen, som er samordnar for aksjonen på skulen. Tidlegare har ein både samla inn pengar til Kamerun og Vietnam, men også i fjor gjekk pengane til Brasil.

? Me får inn pengar ved at elevane betalar ein frivillig startkontigent på løpet dei er med på i dag, onsdag. Me trur dei lærer meir ved å gjera noko i tillegg til å gje pengar, seier Corneliussen.
Sidan skulen nett har fått elektroniske orienteringsbrikker, vart dei tekne i bruk under løpet, som gjekk frå folkehøgskulen til Storeknappen, ein tur på om lag tre kilometer ein veg. Innlagt var både bakkeløp og spurt.

Jobba
Men elevane sin innsats er ikkje slutt med dette. I morgon skal alle elevane i åttande og niande klasse jobba eller skaffa pengar på andre måtar til aksjonen. Alle skal skaffa minst 250 kroner kvar, fortel Corneliussen.
Startkontigenten i løpet skal gå til leiker, klede eller anna som borna på barneheimen treng og som Robin og læraren frå skulen skal ha med seg.

Spent på musikken
Ingunn Hungnes er plukka ut blant lærarane til å vera med. Også ho måtte skriva søknad til rektor.
? Eg underviser i musikk og vil bruka turen til å finna ut litt om musikken i Brasil, i tillegg til sjølvsagt å sjå korleis borna lever, seier Hungnes til Strilen. Frå kvar skule skulle der vera personar av ulikt kjønn. Sidan læraren vart plukka ut først, vart det ein gut blant elevane som fekk vera med.

Alt i går fekk elevane ein liten forsmak på den brasilianske musikken i undervisninga. I alle klassane vil dei også ha tema om Brasil, og elevane skal få sjå ein film om korleis gateborna lever. Barneheimen som dei to frå Meland skal besøkja, ligg i ein svært fattig del av Brasil, med mange born utan foreldre. I alt skal ti personar frå Noreg vera med på turen til Brasil. Dei andre lærarane og elevane kjem frå Ny-Krohnborg skole i Bergen og ein skule i Stavanger. Turen startar 26. november og varer i ni dagar.