Solide overskot

Wergeland Holding AS er det selskapet i heile distriktet som skaffar mest pengar i statskassen i 2004. Med ei skattbar inntekt på 22,9 millionar kroner og 6,4 millionar kroner i skatt, toppar dei lista i Nordhordland og Gulen.

Og ikkje nok med det. Steinknuseverket i konsernet, Halsvik Aggregates AS, hadde ei skattbar inntekt på 8,4 millionar kroner i 2004, og Wergeland Halsvik AS vel millionen. Samla står Wergeland-selskapa i Sløvåg dermed for 32 millionar i inntekt og over sju millionar kroner i skatt.

Til oljeindustrien
Som forklaring på det svært gode resultatet i 2004 seier dagleg leiar Lars Hellandsjø:
? Det var eit godt år mellom anna på grunn av leveransar av stein til oljeindustrien, og inneverande år vert også bra.

Steinknuseverket leverer stein til dekka til gassleidningen frå Ormen Lange-feltet til landanlegget på Aukra i Romsdal, og til leidningen som går sørover til Storbritannia. Hellandsjø håpar at ein del av dei sju millionane i skatt dei betalar, kjem kommunen til gode.

Septik og tankar
Men også Johny Birkeland Transport AS hadde eit svært godt år i 2004. Selskapet driv mellom anna med tømming av septiktankar, men dei har fleire bein å står på. ? Om lag 30-40 prosent av omsetnaden vår gjeld reingjering av tankar på supplybåtar som ligg ved kai i Sløvåg, fortel dagleg leiar Johny Birkeland i selskapet til Strilen. Selskapet har også ansvar for oppsamling av sand og jord frå vegkummar i Bergen kommune.
? 2004 var nok eit spesielt godt år for oss, fastslår Birkeland overfor Strilen.

Forlik
At Gulen Skyssbåtservice AS, som mellom anna driv skyssbåten «Tornerose», kom så godt ut i 2004, har spesielle årsaker, seier dagleg leiar Per Vold. ? Me har hatt gåande ei sak med Kystverket, som trekte seg frå ein kontrakt om leige av ein av båtane våre. Det vart inngått eit forlik i denne saka i 2004, og det slår ut på tala for fjoråret. Eit anna reiarlag på lista, Bjørn Vold AS, driv mellom anna ambulansebåten i Gulen.

Lista i Gulen viser elles at fleire selskap har hatt gode resultat i 2004. Firda Eiendom er eit selskap Ola Braanaas står bak, men som ikkje har noko å gjera med oppdrettsverksemda, seier han til Strilen. Firda Sjøfarmer AS hadde null i inntekt, men betalte likevel 400.000 kroner i skatt, ifølgje Likningskontoret sine lister. Elles viser lista at Stain Management AS, som truleg må ha med Idol-kjendis Håkon Njøten å gjera, hadde inntekter på 299.814 kroner i 2004. Dermed ser det ut for at Idol-eventyret også skaffa litt pengar i kassen.