Spelar tuba på telefonkatalogar

? Det ser kanskje litt merkeleg ut, men det bryr eg meg ikkje om. Skal eg nå opp til munnstykket på tubaen slik at eg kan spela, må eg sitja på to telefonkatalogar, forklarar Edvard Tvedt. 

Han fortel at han byrja spela tuba i haust. I byrjinga sleit han veldig med tubaen. For mange er det vanskeleg nok å få lyd i det store og tunge instrumentet. Men for Edvard vart det ekstra vanskeleg, ettersom han mangla nokre centimeter på å nå opp til munnstykket. Likevel nekta tiåringen å gje opp håpet om å spela tuba i korpset. Dermed sette han hjernen i sving for å finna ei løysing.

? Ein av dei vaksne i korpset gav meg eit tips om at eg kunne sitja på noko. Gjennom reklamen til Gule sider, kom eg på at eg kunne nytta telefonkatalogar. Det er ingenting den ikkje kan hjelpa med, seier Edvard og ler. 

Korpsfamilie

Sjølv om Edvard Tvedt berre har spela tuba i nokre månader, føler han at han alt har fått bra tak på det store instrumentet.

? Eg var aspirant i fjor. Der lærte eg meg notar. Difor klarar eg å spela det meste, så lenge eg har notar og får litt tid til å øva, seier tiåringen.

Den ivrige tubablåsaren går på musikkøving ein gong i veka. I tillegg prøver han å øva mykje heime. Der har Edvard fleire dyktige musikantar som kan hjelpa han.

? Alle søskena mine spelar i korps også. Eg har mellom anna to storesøstre som er veldig flinke, skryt Edvard. 

Fotballgal

Men det er ikkje berre korpsmusikk Edvard er oppteken av på fritida. Så ofte han har sjansen trenar han fotball på kunstgrasbana på Ostereidet, rett ved der han bur. Han er heilt gal etter fotball, og som alle tiårige gutar har også Edvard ein draum om å verta fotballstjerne. Difor håpar han at han får tid til å kombinera både fotball og musikk lenge endå.

? Eg vil helst verta fotballspelar. Men eg har ikkje planar om å gje opp musikken med det same heller. Kanskje eg skal prøva og verta både fotballproff og musikkstjerne, seier Edvard spørjande.

Vil veksa frå katalogane

Sjølv om han forsikrar oss om at han sit godt på telefonkatalogane, håpar han å kvitta seg med dei med tida. Han satsar på å veksa så mykje neste år, at han rekk opp til munnstykket utan hjelp.

? Det vert litt teit visst eg må opptre med telefonkatalogar heilt til eg vert vaksen. No synest eg det er heilt greitt. Eg må nok ha telefonkatalogane under rumpa på julekonsertane i år. Neste jul derimot, er målet å spela konsert utan Gule sider, seier Tvedt.