Spelte for kongen

? Det var litt skummelt, eg har ikkje spelt for kongen før, seier Kristin Aase med store auge.
Under opninga av Festspela i Bergen var Kristin og Knarvik Juniorkorps blant dei heldige som fekk lov å vera med i storkorpset som spelte fordei prominente gjestane. Kong Harald og dronning Sonja kom gåande etter ei lang rekke med politi og vaktar, og saman med ordførar Herman Friele og mange frammøtte kunne dei nyta tonane frå både kongesangen, bergenssangen og fleire marsjar.
? Eg spelte for kronprins Håkon i fjor. Det var ikkje så skummelt. Kongen er liksom meir ... kongeleg, seier Kristin, som spelar euphonium.
Dei andre musikantane nikkar. Det var stort å få spela for kongen. Litt kaldt kanskje, men kjekt. Det vart ein del venting på dei staslege gjestane, og veret var ikkje akkurat det aller beste. Amund Haugen hadde heldigvis kledd seg for anledninga.
? Eg var kjempevarm. Men eg hadde gløymd selen til barytonen min, så eg vart trøtt av å spela og stå så lenge, seier han.
Juniorkorpset spelte saman med fleire andre korps, samt Hans Majestet Kongens Garde.
? Det var gøy. Eg spelte på alle sangane, eg prøvde i alle fall, seier Marte Rydland, som spelar kornett.
? Ja, det var gøy, stemmer Lena Kleivdal i.
Etter fleire timar med speling, spenning og storfint publikum, slappa juniorkorpset av med pizza.
? Me trong ikkje gå på Garden si framsyning i dag, for me skal sjå dei i Nordhordlandshallen på fredag, seier borna.