Stal bil og større pengesummar på Manger

Ein bærbar pc, eit kamera, eit fotoapparat, mykje pengar, bankkort og ein bil er noko av det tjuvane har fått med seg etter to innbrot i helga. Politiførstebetjent Sigmund Erstad ved Radøy lensmannskontor karakteriserer innbrota som grove tjuveri.
? Tjuveria har skjedd rundt midnatt, og i ein slik avstand frå kvarandre at me trur dei er gjort i ein samanheng, seier Erstad.

Braut seg inn
Det eine innbrotet er gjort i ein villa i Prestmarka. Tjuvar har vore inne i villaen og stole både pengar og bankkort.
Inne fann dei og ein bilnøkkel som passa ein grå Volvo S60 som stod utanfor.
Dermed stakk dei også frå staden med ein forholdsvis ny bil, ein 2003-modell med kjenneteikn ST 77401. Tjuvane kom seg inn ved å bryta opp ei kjøkkendør.
Organisert
Det andre innbrotet skjedde i Kyrhovden, eit bustadfelt like bak kommunehuset på Manger. Der fekk tjuvane tak i ein bærbar pc, eit videokamera, eit fotoapparat og pengar.
Her kom dei seg inn ved å bryta opp ei terrassedør.
? Me trur dette er organisert kriminalitet som ikkje er gjort av lokale kjenningar, seier Erstad.
Begge husa stod tomme då ugjerninga fann stad.
? Uansett er det nesten utruleg at dei tek sjansen på å bryta seg inn slik. Eg håpar me får ei løysing på dette snart, seier Erstad.

Har observasjonar
? Me har observasjonar som tydar på at gjerningsmennene har vore i Knarvik klokka 02.45. Der har dei brukt eit bankkort frå det første innbrotet, seier Erstad.
Han er interessert i å komma i kontakt med vitne.
? Dersom nokon har sett folk som har oppholdt seg i bil i nærleiken av husa som er blitt rana, eller om nokon har sett den grå volvoen i løpet av natta, må dei ta kontakt, seier Erstad.