Starta nettaksjon for bryllaup

Då eg las i BT før helga at Fylkesmannen ikkje ville la dei gifta seg, vart eg rasande, seier Trine. Som mange andre, smelta ho totalt for det fargerike bergensparet etter at ho såg dokumentarfilmen om dei på fjernsynet for ikkje så lenge sidan.

Reagerte spontant
Det ho reagerte på var det tynne grunnlaget avgjersla vart gjort på, nemleg at Kåre Morten i framtida kan koma til å trenga pleie som Maybritt ikkje er i stand til å gje han.
Kven kan ikkje det? Det var ingen som hadde nekta meg å gifta meg med Ola av same grunn. Difor er det rett og slett diskriminering, seier den 23 år gamle sjukepleiaren, som er sambuar med Ola Berntsen Ese og for tida bur på Alverflaten.
Oppropet starta Trine natt til laurdag då ho hadde vakt på Hudavdelinga på Haukeland Universitetssjukehus.

Responsen kom
? Eg spreidde det først blant vener og kjende for å koma i gang. Men responsen eg hadde håpa på, kom ikkje verken den natta eller neste natt. Difor sendte eg ein e-post til BT med spørsmål om dei kunne leggja ein link til nettsida opprop.no neste gong dei skreiv om saka. Etter det har det berre strøymd inn med signaturar, fortel Trine.
? Kjem du til å stilla med risengryn utanfor Johanneskirken 5. mai dersom det vert bryllaup?
Så langt har eg ikkje tenkt enno, men eg håper inderleg Fylkesmannen gjer om avgjersla. Eg las akkurat at Kåre Morten har fått ny verge og at Fylkesmannen no vil sjå på saka personleg. Det var gode nyhende, seier ho.
Like før Strilen gjekk i trykken i ettermiddag, var det kome inn 1776 underskrifter på www.opprop.no.