Steen ville sova på statueplassering

? Eg må sova på det, sa Knut Steen med ein litt lur smil då han vart spurd om han hadde bestemt seg for Skjerjehamn eller Marsteinen i Austevoll.
Under stort medieoppstyr kom Knut Steen i dag til Skjerjehamn for å sjå den staden der fiskeoppdrettar Ola Braanaas vil plassera den omstridde statuen av kong Olav viss kunstnaren sjølv bestemmer seg for å selja til Braanaas.

På haugen
Steen kom til Skjerjehamn i båt saman med Ola Braanaas og mange frå familien hans. Natt til i dag hadde Steen, dottera Hege og ei veninne av henne, overnatta på Svinøy heime hos Braanaas. Der skal der vera til i morgon.
Steen vart teken med rundt på området der det er meininga at statuen skal stå, og han var også oppe på den haugen der Braanaas har tenkt å ha statuen. Der vil han vera godt synleg frå sjøen og like ved skipsleia. Medan Steen var på besøk, kom to av Fjord 1 sine snøggbåtar forbi.

Skjerjehamn best
Medan Steen sjølv ikkje ville avsløra om han vel Marsteinen eller Skjerjehamn, var dottera Hege Steen heilt klar.
? Eg tykkjer absolutt Skjerjehamn er best. Her vil mange sjå henne, medan på Marsteinen vert ho ståande langt frå folk.
Ifølgje dottera vil Steen avsløra på onsdag kva han bestemmer seg for.
Tidlegare denne veka var Steen på synfaring på Marsteinen, der dei også ønskjer Olav-statuen velkomen.
Den omstridde statuen skulle eigentleg stått på Rådhusplassen i Oslo, men då politikarane der såg sluttproduktet, ville dei ikkje ha han.