Steinar mot bilar og kyrkjelydshus

– Det small godt, fortel sokneprest Åge Palmesen til Strilen etter sprengingsuhellet i samband med gangbrua i Alversund.

Ved 15.00-tida tysdag opplevde han og dei andre tilsette at det fauk stein både på kyrkjelydshuset og like i nærleiken.

– Ein stein stor som ein knyttneve knuste ei rute i bilen til kontordama ved kyrkjelydskontoret, seier Palmesen.

Han viser og fram ein atskilleg større stein som fauk avgarde. Det er kanskje ein av steinane som knuste takstein på huset.

– Det har og kome inn meldingar om at bilar parkert ved Alversund skule har fått skader, går det fram av politiet sin logg, som vart offentleggjort like etter klokka 15.30.

Politiet vart varsla klokka 15.09. Til alt hell førte ikkje sprenginga til personskader.

– Og til alt hell gjekk det heller ingen glasruter i uhellet, seier Palmesen. Han reknar med at skadane på taket på huset og på ein eller fleire bilar vert dekka av forsikringa til entreprenøren som fyrte av salven, der ein del steinaltså kom på avvegar.

Då Strilen var på staden ved 16.45-tida, vart det også folk på taket av eit bustadhus like i nærleiken for å sjekka om det var påført skader.