Steller pent med pendlarane

– Ja, det går eit par hundre tusen kroner i året til det, seier rådmann Vidar Bråthen. Han synest det er vel anvende kroner i og med at ordninga kan gjera kommunen litt meir attraktiv som bustadkommune.

Det er Stian Herøy heilt einig i. Han flytta tilbake til Fedje i 2001, og har sidan den tida pendla til jobben sin som lærar på Austrheim vidaregåande skule.

– Det hjelper godt på og er ei veldig positiv ordning for oss som er avhengige av ferja for å koma oss på jobb, seier han.

Tretten pendlarar
I dag er det rundt tretten personar som mottar slikt tilskot.

– Det handlar om å gje litt tilbake til folk som ønskjer å bu her, men ikkje får jobb her. Femten tusen kroner i året viser bra i ein familierekneskap det, seier rådmannen.

Ei gamal og god ordning
Ordninga er på ingen måte ny, men vart kraftig oppjustert for nokre år sidan i jakta på småbarnsfamiliar. Då auka til­skotet frå 10.000 til 15.000 kroner i ein jafs.

– Eg trur ikkje ordninga fanst då eg flytta tilbake hit i 2001, men ho kom på den tida, seier Stian Herøy.

Maks 15.000
Dei som pendlar fem dagar i veka, får inntil 15.000 kroner i årleg pendlartilskot, fordelt på to utbetalingar i året. Tilskotet vert utbetalt etterskotsvis og må søkjast om kvar gong.

– Me har sett ei nedre grense på tre dagar i veka for å få tilskot, og så varierer tilskotet opp til fem dagar, forklarer Bråthen.

Må jo leggja til rette
Bråthen legg til at kommunen også har tilrettelagt opningstidene i barnehagen og SFO-en til å passa med ferjene.

– Vil me at folk skal bu her, må me gjera det me kan for at dei skal få kvardagen til å fungera her også, seier han.