Stilfull Grease på Ostereidet

Heile tiandeklasse var i elden på premierekvelden. Både skodespelarar, solistar, dansarar og dei bak kulissene var med og gjorde framsyninga til ein suksess. Trampeklapp til alle var på sin plass.

Dobbel moro
Då musikalen Grease første gang herja kinolerreta, var det med to store stjerner på plakaten. På Ostereidet har dei no fått sine eigne stjerneversjonar av Olivia Newton John og John Travolta. Ida Kamilla Bjørge og Pia Henriette Eknes gav liv til Sandy, medan Tor Daniel Langeland og Kim Andre Mørner var kveldens Travolta-kopiar i rolla som Danny. Fordi så mange av elevane er engasjert i dramagruppa vart nokre av rollene delt. Dette kan berre reknast som positivt, for publikum fekk nyta fire flotte song- og skodespelartalent.

Nervepirrande
Eit av desse talenta var Ingvild Åsgard, som hadde rolla som tøffe Rizzo i første halvdel av framsyninga. Med innleving og flott stemme song ho med misunning i stemma om den fjollete og pripne Sandy.
? Dette er knallgøy, og så lenge eg ikkje ser på publikum, så går det bra, seier Ingvild Åsgard til Strilen.
Skodespelarane fekk seg ein pust i bakken i ein pause, men fekk samstundes tid til å kjenna litt på sommarfuglane i magen.
? Det er første gongen eg står framføre folk og syng, men det vert og den siste, seier Åsgard med skjelvande stemme.
Også Kristoffer Eknes gjorde ein spesielt god figur i si rolle som Kenickie. Han engasjerte med god innleving og bra bruk av dialekt.

? Kjempekjekt
Med full sal og god applaus gjennom heile framsyninga var det klart at publikum likte det dei fekk sjå.
? Dei er kjempeflinke, og dei verkar scenevande for å vera så unge, seier Ragnhild Namdal.
Om elevane har sommarfuglar i magen, er ikkje det noko som lett kan merkast for folk i salen.
? Dei verkar ikkje som om dei er redde for noko, men litt sommarfuglar er nok normalt. Dei kan tekstane sine, og er kjempeflinke, seier Eva Carlsen.
At det ligg mykje arbeid bak ei slik framsyning er heilt klart. I tillegg til skodespel har elevar og lærarar også jobba med dans, kor, kostyme, kulisser, lys og lyd, PR og administrasjon, musikk, sceneklargjering og catering. Det var ein stolt rektor ved Ostereidet ungdomsskule som sette i gong showet då alt endeleg var klart på premierekvelden.
? Dette er ei framsyning me er stolte av, seier rektor Knut G. Johannesen.