– Stopp dette kaoset før liv går tapt

Det seier Tore Ljones i Juvikstølen vel og rektor Olaf Hella ved Knarvik ungdomsskule i etterkant av eit møte fredag.

Møtet på ungdomsskulen tok opp temaet som og er på dagsorden ved andre skular i Nordhordland:
Trafikkfaren om morgonen når elevar går av skulebussane, samstundes som mange foreldre køyrer borna sine i privatbilar. No i mørktida er dette ekstra risikabelt.

Også barneskuleelvar
I Knarvik ligg den vidaregåande skulen på Juvikstølen og ungdomsskulen tett ved kvarandre. Det fører til ein ekstra konsentrasjon av bussar og privatbilar mellom klokka åtte og halv ni.

– I dette området er det eit ekstra faremoment. Det er alle dei yngre elevane som skal gå frå Juvikstølen og ned til barneskulen. Dei må rett gjennom dette området, men utan at det er eit einaste oppmerka gangfelt, påpeikar Tore Ljones.

Han peikar på at den mørke årstida er verst, med størst trafikk og dårlegast sikt.

Tiltaksliste
På møtet fredag deltok både rektorane på ungdomsskulen, barneskulen, den vidaregåande skulen samt kommunen og lensmannskontoret.

Møtet er ei oppfølging av eit tilsvarande møte i vår, der ein også såg på ulike tiltak for å gjera det tryggare å ferdast i området.

– Møtet fredag var konstruktivt og me fekk sett ned tidsfristar og kven som tek ansvar for kva, seier Tore Ljones og Olaf Hella til Strilen.

Begge er redde for at elevar kan verta skadde eller at liv i verste fall kan gå tapt dersom ikkje noko vert gjort snarast.

Opphøgd gangfelt
Eit tiltak som raskt skal gjennomførast, er opphøgd gangfelt på oppsida av ungdomsskulen, der vegen går inn til idrettsbana, EBML-huset og Juvikstølen.

– Dette har avdelingsleiar Arne Eikefet i kommunen lova å få raskt på plass. Det same gjeld ein bom med saksing på gangvegen i same område, opplyser Hella og Ljones.

Langs ungdomsskulen skal det og setjast opp skilt med stans forbode. For å hindra brot på dette tiltaket, vil lensmannskontoret setja i verk patruljering og bøtelegging ved skulane både på morgon og kveldstid.

– Eitt av måla med tiltaka er å skapa fri sikt langs oppsida av ungdomsskulen, seier rektor Olaf Hella.

Innan 1. april er det eit mål å ha på plass fartshumpar mellom ungdomsskulen og den vidare­gåande.

«Bak skulen»
Tore Ljones håpar og å få tatt i bruk det som i dag er ein grusveg på nordsida av den vidaregåande skulen.

– Dette er ein veg som lett kan omgjerast til ny tilkøyringsveg til parkeringsplassen på nedsida, seier Ljones. Han viser til at det vil få ein del privatbilar bort frå området med mest trafikk.

Ljones vil ta dette opp med fylkeskommunen via Juvikstølen fvel.