Stor handelslekkasje i Masfjorden og Fedje

I første halvår 2005 handla ein gjennomsnittsnordmann for 27.850 kroner ut frå omsetnaden i detaljhandelen, viser tal frå Statistisk sentralbyrå. Det er ein auke på 3,1 prosent samanlikna med fjoråret. Viss ein reknar med at folk stort sett handlar like mykje over heile landet, viser tala at i Masfjorden og på Fedje brukar innbyggjarane berre kvar tredje krone i butikkar innanfor kommunen sine grenser.

Lågast er det i Masfjorden med 9.354 kroner.

Dette har sjølvsagt ikkje berre med lojalitet å gjera, men også kva slag butikkar som finst innanfor kommunen sine grenser. På Fedje og i Masfjorden er mange vareslag ein ikkje får tak i.

Til Knarvik

Ut frå tala er det berre Lindås som kan visa til handelsinnvandring. Og det skuldast sjølvsagt først og fremst butikkane i Knarvik, som trekkjer til seg kundar frå heile Nordhordland, og ein del frå sørsida av fjorden og.

Omsetnaden i Lindås ligg på 31.810 kroner pr. innbyggjar. Viss ingen i Lindås handla utanfor kommunen sine grenser, skulle det tilseia at knapt 4.000 kroner av dette vert handla av kundar som ikkje bur i kommunen. Så enkelt er det sjølvsagt ikkje, men tala gjev ein peikepinn om kor handlestraumane går.

Lojale Austrheim

Tala for Nordhordland og Gulen viser elles at folk i Austrheim er flinke å handla i eigen kommune. Folk i Meland er derimot ikkje særleg lojale, medan Radøy, Modalen og Gulen er så midt på treet.

Litt påfallande er det at tala er så høge i ein så liten kommune som Modalen, men kanskje har avstand noko å seia.

?          Detaljhandelen pr. innbyggjar første halvår 2005 var slik:

            Kommune        Omsetnad i kr

            Lindås              31.810

            Austrheim        22.203

            Modalen          16.751

            Radøy              15.831

            Gulen               14.239

            Meland                        10.399

            Fedje               9.977

            Masfjorden      9.354

Handlar i heimkommunen
? Så lenge prisane er greie og eg finn det eg vil ha, ser eg ingen grunn  til å handla andre stader.

Betty Bakken Kleppe har gjort unna den dagleg handelen i Rimi-butikken i Mastrevik Torg. Ho har budd 27 år i Austrheim og ser ingen grunn til å reisa utanfor kommunen sine grenser når ho skal handla.

? Viss det er noko dei ikkje har, er dei flinke til å skaffa det, og prisane er slik midt på treet, seier ho.

Men ikkje alt handlar ho i Austrheim.

? Når det gjeld kle, reiser eg til Knarvik eller Bergen. Eg finn ikkje det eg likar her, slår ho fast.