Stor tilflytting til lindås

Førebelse tal viser at Lindås kan få ein folkeauke på 338 i 2006. Det gjev ein prosentvis vekst på 2,544. Det gjer Lindås til vekstkommune nummer ein i Hordaland når det gjeld folketal i år. Skulle den veksten halda fram, vil Lindås om nokre få år passera 15.000 innbyggjarar. Ved årsskiftet vil folketalet vera 13.623 slik det no ser ut.
Sjølv om det for tida er stor byggeaktivitet i søre deler av kommunen, skal det noko til om veksten frå 2006 held fram i same tempo. Viss så skulle skje, vil kommunen få endå større press både på skular og barnehagar i denne delen av kommunen enn det som er no.

Passert Askøy
Askøy har dei siste åra stått fram som vekstkommunen i Hordaland. Veksten er stor også i 2006, og folketalet går opp med 505, men prosentvis har dei berre auke på 2,244.
Dei neste på lista er Os med ein auke på 2,110, Sund med ein auke på 1,934 prosent og Fjell med ein auke på 1,887 prosent.
Austrheim hadde ein auke på 0,885 prosent i 2006, Meland ein prosentvis auke på 0.657.

Mest ned
Masfjorden kan registrera den prosentvis største nedgang i folketalet av kommunane i Hordaland i 2006. Dette også med klar margin. Nedgangen er ifølgje tala frå Statistisk sentralbyrå på 64 personar, som utgjer 3,780 prosent. Fedje inntek plassen like over med ein nedgang på 2,037 prosent. Deretter kjem Odda med 1,517 prosent og Tysnes med 1,602 prosent.
Gulen har ein nedgang på 0,620 prosent og Modalen 0,564 prosent. Men sidan folketalet er så lite her, utgjer det berre to personar. Nedgangen i Radøy er heilt ubetydeleg. Folketalet der ser ut til å gå ned med ein person.