Stor trafikkaksjon

Anne Britt Wergeland var ei av dei som vart stoppa, og ho måtte ta alkotest.
? Eg må seia at eg vart litt stressa med det same eg såg alle politifolka, seier Wergeland.
Men ho synest at de er bra at det er slike kontrollar, for det er mykje stygg kjøring å sjå. Særleg reagerer ho på ein del stygge forbikjøringar.

Prøveområde
Nordhordland er plukka ut som prøveområde i Hordaland for ei storstilt satsing på informasjon og kontrollar for å få ned talet trafikkulukker.
? Ei årsak til at denne regionen er vald som prøveområde, kan nok vera at det har vore veldig mange trafikkuhell her i det siste, seier Ove Hindenes ved Lindås og Meland lensmannskontor.
Han seier at det vert fleire kontrollar framover, sjølv om det vert ei stund til dei gjennomfører like store aksjonar som dei hadde i går.

Eit samarbeidsprosjekt
Prosjektet er eit samarbeid mellom politiet, Vegvesenet, trafikkskular og Trygg Trafikk, og er ein del av fylket sin handlingsplan for trafikksikring 2006 - 2009.
Under aksjonane skal dei stoppa flest mogleg bilistar, ikkje først og fremst for å bøteleggja, men for å formidla informasjon. Dei delar ut brosjyrar og let folk få testa korleis det kjennest når bilen går rundt eller kolliderer.
? Men me gjennomfører også fartsmålingar og promillekontrollar under aksjonen, seier Hindenes.
Heilt utan bidag til statskassa frå fartsglade bilistar vart nok difor ikkje denne aksjonen. Den tida Strilen var innom var det ein bilførar som vart målt til 93 km/t med laseren.

Fekk testa bråstoppen
I tillegg til kontroll og utdeling av informasjonsmateriell, fekk bilførarar prøva korleis det er å sitja i setet når ein får bråstopp.
? Testen tilsvarar åtte km/t, men eg kan lova at dei som har prøvd dette ikkje set seg oppi bilsetet den nærmaste tida utan sikringsbelte, seier trafikklærar Rune Arnesen.
Alle som må gjennom tryggleikskurs på bane, får i dag testa dette.
Folk fekk også prøva seg i «Velte-Petteren», som er ein bilkupe dei kan snurra rundt. På den måten får ein kjenna på kroppen korleis det er å trilla rundt med bilen.
Det er første gong det vert gjennomført ein så stor aksjon her i Hordaland, fortel trafikkkoordinator Inge Nordstrønen, som var ansvarleg for aksjonen. Han fortel at dei i tillegg til ved krysset til Åse, hadde ein kontroll ein annan stad i regionen.